హైదరాబాద్, జూన్ 25: తెలంగాణ, ఆంధ్రప్రదేశ్‌తో పాటు దక్షిణ, మధ్యభారతదేశంలోని చాలా ప్రాంతాల్లో వచ్చే మూడురోజుల్లో భారీ నుండి అతిభారీ వర్షాలు కురిసే అవకాశం ఉందని భారత వాతావరణ శాఖ (ఐఎండి) ప్రకటించింది. బంగాళాఖాతంలో ఏర్పడ్డ అల్పపీడన ప్రభావం వల్ల నైరుతీ రుతుపవనాలు బలంగా ఉన్నాయని, వచ్చే 48 గంటల్లో ఇవి గుజరాత్, మధ్యప్రదేశ్, బీహార్, ఉత్తరప్రదేశ్ తదితర రాష్ట్రాల్లో అనేక ప్రాంతాలకు విస్తరిస్తాయన్నారు.

హైదరాబాద్, జూన్ 25: తెలంగాణ ప్రజలకు సిఎం కె.చంద్రశేఖరరావు, గవర్నర్ నరసింహన్ రంజాన్ శుభాకాంక్షలు తెలిపారు. పవిత్ర రంజాన్ మాసం ప్రజల జీవితాల్లో సుఖసంతోషాలను తీసుకు వస్తుందని సిఎం ఆశాభావం వ్యక్తం చేశారు. మత సామరస్యానికి, సర్వమత సౌభ్రాతృత్వానికి నెలవైన తెలంగాణ రాష్ట్రంలో ప్రజలంతా ఆనందంగా, గంగా జమునా తహజీబ్ సంస్కృతి ప్రతిఫలించేలా పండుగ చేసుకోవాలని కెసిఆర్ పిలుపునిచ్చారు.

సిద్దిపేట, జూన్ 24 : రాష్ట్ర ప్రభుత్వం నిరుద్యోగ సమస్యను పరిష్కరించేందుకు కృతనిశ్చయంతో పనిచేస్తోందని భారీ నీటిపారుదల శాఖ మంత్రి హరీష్‌రావు అన్నారు. ఈసంవత్సరం పాటు వచ్చే సంవత్సరం సైతం మరో డిఎస్సీ నిర్వహించి ఉపాధ్యాయ పోస్టులను భర్తీ చేస్తామన్నారు. కొత్తగా 26 వేల పోలీసు కానిస్టేబల్ పోస్టుల భర్తీకి సిఎం కెసిఆర్ గ్రీన్ సిగ్నల్ ఇచ్చారని, త్వరలో నోటిఫికేషన్ జారీ చేయనున్నట్లు వెల్లడించారు.

రామాయంపేట, జూన్ 24: తెలంగాణ రైతుల ప్రయోజనాల కోసం ప్రభుత్వం నిర్మించే కాలేశ్వరం ప్రాజెక్టును ఎంతమంది కోదండరాంలు అడ్డుకున్నా కట్టితీరుతామని డిప్యూటీ స్పీకర్ పద్మాదేవేందర్‌రెడ్డి అన్నారు. శనివారం మెదక్ జిల్లా రామాయంపేటకు వచ్చిన సందర్భంగా ఏర్పాటు చేసిన విలేఖరుల సమావేశంలో ఆమె మాట్లాడారు. గ్రామాలు ఆర్థిక పరిపుష్టి చెందాలని ప్రభుత్వం పనిచేస్తుంటే కోదండరాంకు కనిపించడం లేదా అని ప్రశ్నించారు.