హైదరాబాద్, మే 10: ఉద్యాన పంటలపై రైతులు ఎదుర్కొంటున్న సమస్యలకు పరిష్కారం కనుగొనే విధంగా పరిశోధనలు జరగాలని తెలంగాణ వ్యవసాయ శాఖ కార్యదర్శి సి.పార్థసారథి సూచించారు. ఈనెల మూడో వారంలో జరగనున్న జోనల్ స్థాయి పరిశోధన, విస్తరణ అడ్వయిజరీ కౌన్సిల్ సమావేశం అజెండాపై చర్చించేందుకు బుధవారం ప్రత్యేక సమీక్ష జరిగింది.

హైదరాబాద్, మే 10: ఖమ్మం పట్టణంలో రైతుల సమస్యలపై రెండు రోజుల పాటు దీక్ష చేపట్టేందుకు అనుమతివ్వాలని టిటిడిపి వర్కింగ్ ప్రెసిడెంట్ ఎ.రేవంత్‌రెడ్డి డిజిపి అనురాగ్ శర్మను కోరారు. ఈ మేరకు ఆయన ఒక వినతిపత్రాన్ని సమర్పించినట్లు తెలిపారు. ఈ నెల 12, 13 తేదీల్లో ఖమ్మంలో తెలుగుదేశం పార్టీ తరఫున రెండు రోజుల దీక్ష చేపడుతున్నామని, ఇందుకు అనుమతించాలని ఖమ్మం పోలీసు కమిషనర్‌కు ఇప్పటికే దరఖాస్తు చేశామని తెలిపారు.

హైదరాబాద్, మే 10: ఆదిలాబాద్ జిల్లా యాపలగూడ గ్రామ శివారులో ఇండియన్ రిజర్వు పోలీస్ బెటాలియన్ ఏర్పాటు కోసం 111.37 ఎకరాలు కేటాయిస్తూ రెవిన్యూశాఖ బుధవారం ఉత్తర్వులు జారీ చేసింది. దీనిని ఉచితంగానే కేటాయించినట్టు పేర్కొన్నారు. ఆదిలాబాద్ మండలం బట్టిస్వరగాన్ గ్రామంలో కేంద్రీయ విద్యాలయం, సిబ్బంది వసతి గృహాల నిర్మాణానికి 10 ఎకరాలు కేటాయిస్తూ రెవిన్యూశాఖ ఉత్తర్వులు జారీ చేసింది.

హైదరాబాద్, మే 10: హైదరాబాద్ జూబ్లీహిల్స్ ప్రమాద ఘటనలో నిషిత్, రాజారవివర్మ దుర్మరణం ఘటనతో రాష్ట్ర వ్యాప్తంగా రోడ్డు ప్రమాదాలకు తరచుగా జరిగే 324 బ్లాక్ స్పాట్స్‌ను సరిదిద్దాలని ప్రభుత్వం చర్యలను వేగవంతం చేసింది. జాతీయ రహదారులు, రాష్ట్ర రహదారులపై మొత్తం 324 బ్లాక్ స్పాట్స్ ఉన్నాయి.