హైదరాబాద్, సెప్టెంబర్ 12: మంగళవారం జరుగనున్న బక్రీద్ పండుగను పురస్కరించుకుని ముస్లింలకు గవర్నర్ ఇఎస్‌ఎల్ నరసింహన్, తెలంగాణ ముఖ్యమంత్రి కె చంద్రశేఖర్‌రావు, ఆంధ్రప్రదేశ్ ముఖ్యమంత్రి ఎన్ చంద్రబాబు నాయుడు, ఎపి ప్రతిపక్ష నాయకుడు వైఎస్ జగన్ వేర్వేరు ప్రకటనలలో శుభాకాంక్షలు తెలిపారు. బక్రీద్ పండుగ సహనం, త్యాగానికి ప్రతీకగా వారు తమ సందేశాల్లో పేర్కొన్నారు.

హైదరాబాద్, సెప్టెంబర్ 12: కొత్త జిల్లాకు కోటి రూపాయలు, పాత జిల్లాలకు రూ. పాతిక లక్షలు చొప్పున మంజూరు చేస్తూ ప్రభుత్వం సోమవారం ఉత్తర్వులు జారీ చేసింది. దీని కోసం మొత్తం 19కోట్ల 25లక్షలు మంజూరు చేశారు. రాష్ట్రంలో ప్రస్తుతం పది జిల్లాలు ఉండగా, హైదరాబాద్ మినహా మిగిలిన జిల్లాలను విభజిస్తూ మొత్తం 27 జిల్లాలను చేస్తున్నారు. వీటిలో పదిహేడు కొత్త జిల్లాలు.

హైదరాబాద్, సెప్టెంబర్ 12: జిల్లాల పునర్విభజనపై ఈ నెల 21 లేదా 22న తుది నోటిఫికేషన్ జారీ చేయడానికి అధికారులు కసరత్తు చేస్తున్నారు. జిల్లాలు, రెవిన్యూ డివిజన్లు, మండలాల పునర్ విభజనపై గత నెల 22న ముసాయిదా విడుదల చేసిన విషయం తెలిసిందే. ముసాయిదాలోని ప్రతిపాదిత జిల్లాలు, డివిజన్లు, మండలాలపై అభ్యంతరాలు, సూచనలను ప్రజల నుంచి స్వీకరించడానికి ఇచ్చిన నెల రోజుల గడువు ఈ నెల 20న ముగియనుంది.

హైదరాబాద్,సెప్టెంబర్ 12: నీటిపారుదల ప్రాజెక్టులపై కాంగ్రెస్ నాయకులు అవగాహన లేకుండా మాట్లాడుతున్నారని టిఆర్‌ఎస్ ఎంపిలు బి వినోద్, బాల్కసుమన్ వేరువేరుగా నిర్వహించిన విలేఖరుల సమావేశంలో విమర్శించారు. తెలంగాణభవన్‌లో సోమవారం జరిగిన విలేఖరుల సమావేశంలో ఎంపిలు మాట్లాడారు. ఉనికి కోల్పోతుందనే భయంతోనే కాంగ్రెస్ నాయకులు ధర్నాలు చేస్తున్నారని ఎంపి వినోద్ విమర్శించారు.