వరంగల్: పెట్రోల్ ట్యాంకర్లతో వెళుతున్న ఓ గూడ్సురైలు వరంగల్ స్టేషన్‌లో ఒక్కసారి ట్రాక్‌నుంచి పక్కకు ఒరిగింది. ఈ విషయాన్ని వెంటనే గూడ్స్ డ్రైవర్ గమనించడంతో పెను ప్రమాదం తప్పింది. పక్కకు ఒరిగిన ట్యాంకర్‌ను తప్పించి మిగతా గూడ్సును పంపించివేశారు. యుద్ధప్రాతిపదికపై ట్రాక్‌కు మరమ్మతులు చేపట్టారు.

హైదరాబాద్‌: బంగాళాఖాతం నుంచి వీస్తున్న తేమగాలుల కారణంగా వాతావరణం బాగా చల్లబడి పలుచోట్ల వర్షాలు పడుతున్నాయి. బంగాళాఖాతంలో ఏర్పడిన అల్పపీడనంతో నైరుతి రుతుపవనాలు చురుగ్గా కదులుతున్నాయి. తెలంగాణలో మంగళ, బుధవారాల్లో పలుచోట్ల భారీ వర్షాలు పడే అవకాశముంది. ఆదివారం ఉదయం నుంచి మంగళవారం ఉదయం వరకూ పలు ప్రాంతాల్లో వర్షాలు కురిశాయి. అత్యధికంగా ఖమ్మం జిల్లా కోహెడాలో 18 సెంటీమీటర్ల వర్షం కురిసింది.

వరంగల్: హైకోర్టు విభజన, ఆంధ్రా జడ్జిలకు ఆప్షన్ల విషయమై కొద్ది రోజులుగా తెలంగాణ న్యాయవాదులు చేస్తున్న ఆందోళన నానాటికీ తీవ్రరూపం దాలుస్తోంది. తమ డిమాండ్లను వెంటనే తీర్చాలని నినాదాలు చేస్తూ ఇక్కడి హన్మకొండలోని జిల్లా కోర్టులో లాయర్లు మంగళవారం ఉదయం ఫర్నిచర్‌ను ధ్వంసం చేశారు. పోలీసులు అడ్డుచెప్పినప్పటికీ లాయర్లు కోర్టు హాలులోకి ప్రవేశంచి కుర్చీలు, బెంచీలను విరగ్గొట్టి విసిరేశారు.

సిద్దిపేట రూరల్, జూన్ 27: ఎన్ని కుట్రలు పన్నినా మల్లన్నసాగర్ ప్రాజెక్టును కట్టి తీరుతామని నీటి పారుదల శాఖ మంత్రి తన్నీరు హరీశ్‌రావు స్పష్టం చేశారు. మెదక్ జిల్లా సిద్దిపేట మండలం రాఘవాపూర్ గ్రామంలో సోమవారం జరిగిన సమావేశంలో మంత్రి మాట్లాడుతూ, పోరాడి సాధించుకున్న తెలంగాణను బంగారు తెలంగాణగా తీర్చిదిద్దుకునేందుకు ప్రాజెక్టులు కడుతుంటే టిడిపి, కాంగ్రెస్ నేతలు అడ్డుకోవడం సిగ్గుచేటన్నారు.