హైదరాబాద్: ముస్లింలకు రిజర్వేషన్లు కల్పిస్తామని సిఎం కెసిఆర్ పదే పదే మోసం చేస్తున్నారని శాసనమండలిలో కాంగ్రెస్ నేత షబ్బీర్ అలీ ఆరోపించారు. ఆయన సోమవారం ఇక్కడ మీడియాతో మాట్లాడుతూ, ఇఫ్తార్ విందులో మళ్లీ ముస్లిం రిజర్వేషన్ల అంశాన్ని కెసిఆర్ ప్రస్తావించారన్నారు. అసెంబ్లీలో తీర్మానం చేసి కేంద్రానికి పంపినంత మాత్రాన ముస్లింలకు రిజర్వేషన్లు రావన్నారు. చట్టపరమైన చర్యలు తీసుకోవాలన్నారు.

హైదరాబాద్: తెలంగాణలో పెంచిన ఆర్టీసీ చార్జీలను తగ్గించాలని డిమాండ్ చేస్తూ బిజెపి నేతలు, కార్యకర్తలు సోమవారం నగరంలోని బస్ భవన్‌ను ముట్టడించేందుకు విఫలయత్నం చేశారు. ఈ సందర్భంగా పోలీసులకు, కార్యకర్తలకు మధ్య తోపులాట జరిగింది. కొంతమంది ఆందోళనకారులను అరెస్టు చేసి పోలీసు స్టేషన్‌కు తరలించారు.

దిల్లీ: తెలంగాణలో 1500 కోట్ల రూపాయల అంచనా వ్యయంతో చేపట్టే ఫార్మాసిటీ నిర్మాణానికి తొలి విడతగా 200 కోట్లు ఇచ్చేందుకు కేంద్రం అంగీకారం తెలిపిందని మంత్రి కెటిఆర్ అన్నారు. దిల్లీ పర్యటన సందర్భంగా ఆయన సోమవారం నాడు కేంద్ర వాణిజ్యమంత్రి నిర్మలా సీతారామన్‌ను కలిశారు. తెలంగాణలో బహుళ ప్రాజెక్టులతో సెజ్‌లు మంజూరు చేయాలని కేంద్రానికి విజ్ఞప్తి చేసినట్టు ఆయన తెలిపారు.

హైదరాబాద్: మెదక్ జిల్లాలో చేపట్టే మల్లన్నసాగర్ ప్రాజెక్టులో భూ సేకరణకు సంబంధించి 12 మంది రైతులు దాఖలు చేసిన పిటిషన్‌ను హైకోర్టు సోమవారం కొట్టివేసింది. ప్రాజెక్టు కోసం బలవంతంగా భూ సేకరణ జరగదని, రైతుల సమ్మతితోనే భూ సేకరణ చేస్తారని తెలంగాణ ప్రభుత్వ అడ్వకేట్ జనరల్ ఇచ్చిన సమాధానంతో సంతృప్తి చెందాక హైకోర్టు ఈ నిర్ణయం తీసుకుంది.