ఖమ్మం: అందమైన హామీలతో అధికారంలోకి వచ్చిన తెరాస అధినేత కెసిఆర్ మాటలు ఇక చెల్లవని కాంగ్రెస్ ఎంపి రేణుకాచౌదరి శుక్రవారం ఇక్కడ అన్నారు. ప్రజలకు మేలైన పాలన అందించడానికి బదులు ఆయన మాటలతో ఎన్నాళ్లు నెట్టుకొస్తారని ఆమె ప్రశ్నించారు. రెండేళ్ల పాలనలో తెరాస సర్కారు చేసిందేమీ లేదని విమర్శించారు.

హైదరాబాద్: ప్రేమించి పెళ్లి చేసుకున్న కొత్తదంపతులు పోలీస్ స్టేషన్ ఎదుట ఆత్మహత్యకు యత్నించిన ఘటన సికింద్రాబాద్ బోయిన్‌పల్లిలో శుక్రవారం జరిగింది. కొన్నాళ్లుగా ప్రేమించుకుంటున్న భవానీశంకర్, కీర్తిరెడ్డి తమ కుటుంబ పెద్దలను కాదని రెండురోజుల క్రితం పెళ్లి చేసుకున్నారు. కుటుంబ సభ్యుల నుంచి రక్షణ కల్పించాలని కోరుతూ వీరు పోలీస్ స్టేషన్‌కు వెళ్లారు.

హైదరాబాద్: ఓ ప్రముఖ సాఫ్ట్‌వేర్ సంస్థలో ఉద్యోగాలు ఇప్పిస్తానని 20 మంది యువకుల నుంచి లక్షలాది రూపాయలు వసూలు చేసి వంచించిన ఓ కన్సల్టెంట్‌ను పోలీసులు అరెస్టు చేశారు. డబ్బులిచ్చి చాలా రోజులైనా ఉద్యోగాల ఊసే లేకపోవడంతో అనుమానం వచ్చిన కొందరు నిరుద్యోగులు ఎస్‌ఆర్ నగర్ పోలీస్ స్టేషన్‌లో ఫిర్యాదు చేశారు. దీంతో కన్సల్టెంట్ భాస్కర్‌ను అరెస్టు చేసి పోలీసులు వివరాలు రాబడుతున్నారు.

నల్గొండ: అన్ని రంగాల్లో తెలంగాణను అభివృద్ధి చేసేందుకు ప్రభుత్వం ప్రయత్నిస్తుండగా విపక్షాలు అడ్డుతగులుతున్నాయని మంత్రి హరీష్‌రావు ఆరోపించారు. ఆలేరులో జరిగిన తెరాస కార్యకర్తల సమావేశంలో ఆయన మాట్లాడుతూ, మల్లన్నసాగర్ ప్రాజెక్టు విషయంలో ప్రతిపక్షాలు దుష్ప్రచారం చేస్తున్నాయన్నారు. ప్రాజెక్టులను అడ్డుకుంటున్న కాంగ్రెస్, టిడిపి నేతలను ప్రజలే నిలదీయాలన్నారు.