హైదరాబాద్, జూన్ 23: మల్లన్నసాగర్ ప్రాజెక్టులో ముంపు బాధితులకు పరిహారం చెల్లించే విషయంలో ప్రభుత్వం సరిగా వ్యవహరించడం లేదని టిజెఎసి చైర్మన్ ప్రొఫెసర్ కోదండరామ్ విమర్శించారు. మల్లన్న సాగర్ బాధితులకు జెఎసి అండగా ఉంటుందని తెలిపారు. ప్రాజెక్టులు వస్తేనే రైతుల ఆత్మహత్యలు ఆగుతాయని, అయితే మన కోసం ప్రాజెక్టుల్లో భూములు కోల్పోయే రైతులకు, గ్రామాలకు ముందు న్యాయం చేయాలని అన్నారు.

హైదరాబాద్, జూన్ 23: ఆర్టీసీకి తక్షణం రూ.300 కోట్ల సాయం అందించాలని ముఖ్యమంత్రి కె చంద్రశేఖర్‌రావు ఆర్థికశాఖ అధికారులను ఆదేశించారు. అలాగే కొత్త బస్సుల కొనుగోలు కోసం మరో రూ. 350 కోట్లను రుణంగా ఆర్టీసీకి ఇప్పించాలని సిఎం ఆదేశించారు. ఆర్టీసి చార్జిల పెంపు నిర్ణయం తీసుకునే ముందు గురువారం సాయంత్రం రవాణాశాఖ మంత్రి మహేందర్‌రెడ్డి, ఆర్టీసీ చైర్మన్ సోమారపు సత్యనారాయణతో ముఖ్యమంత్రి సమీక్షించారు.

హైదరాబాద్: ప్రజలపై భారం మోపాలన్న ఉద్దేశం లేనప్పటికీ ఆర్టీసీ బస్ చార్జీలను పెంచకతప్పడం లేదని, సంస్థను ఆర్థిక నష్టాల నుంచి గట్టెక్కించేందుకే ఈ నిర్ణయం తీసుకున్నామని తెలంగాణ రవాణాశాఖామంత్రి మహేందర్ రెడ్డి గురువారం సాయంత్రం మీడియాతో చెప్పారు. పల్లెవెలుగు బస్సుల్లో 30 కిలోమీటర్ల లోపు 1.30 రూపాయలు, ఆ దూరం దాటితే రెండు రూపాయల చొప్పున పెంచామన్నారు.

వరంగల్: ఇక్కడి రైల్వేస్టేషన్‌లో కదిలిన రైలు ఎక్కేందుకు ప్రయత్నించి గురువారం ఓ మహిళ అక్కడికక్కడే మరణించింది. రాయపర్తి మండలం మైలారం గ్రామానికి చెందిన ఆమె రైలు ఎక్కుతూ తన చేతుల్లో ఉన్న చిన్నారి పాపను దూరంగా విసిరేసింది. గాయపడిన చిన్నారిని ఆస్పత్రికి తరలించారు.