కరీంనగర్: తెలంగాణలో తీవ్ర కరవు పరిస్థితుల వల్ల రైతులంతా బాధల్లో ఉండగా రాష్ట్ర అవతరణ దినోత్సవం పేరిట సంబరాలు జరపడం తగదని మాజీ ఎంపీ పొన్నం ప్రభాకర్ విమర్శించారు. సంబరాల పేరిట ప్రభుత్వం విచ్చలవిడిగా నిధులను ఖర్చు చేస్తోందన్నారు. ఎన్నికల ముందు ఇచ్చిన హామీలను అమలు చేయడంలో సిఎం కెసిఆర్ విఫలం చెందారన్నారు. ప్రజాసంక్షేమ పాలన కేవలం కాంగ్రెస్‌కే సాధ్యమన్నారు.

వరంగల్: రెండు తెలుగురాష్ట్రాల ముఖ్యమంత్రులు కెసిఆర్, చంద్రబాబు దళితులను వంచిస్తున్నట్లు ఎమ్మార్పీఎస్ నాయకుడు మందకృష్ణ మాదిగ మంగళవారం ఇక్కడ ఆరోపించారు. ఎమ్మార్పీఎస్‌పై ఎపిలో పోలీసులు నిఘా పెట్టడంలో చంద్రబాబు ఉద్దేశం ఏమిటని ఆయన ప్రశ్నించారు. దళితుడిని సిఎం చేస్తానన్న కెసిఆర్ ఆ వర్గాలకు అన్యాయం చేస్తున్నారన్నారు.

హైదరాబాద్: తెలంగాణ నుంచి రాజ్యసభ ఎన్నికల్లో పోటీ చేస్తున్న తెరాస అభ్యర్థులు డి.శ్రీనివాస్, కెప్టెన్ లక్ష్మీకాంతరావు మంగళవారం ఉదయం టి.అసెంబ్లీ కార్యదర్శి వద్ద నామినేషన్లు దాఖలు చేశారు. పలువురు మంత్రులు, ఎమ్మెల్యేలు, కార్యకర్తలు ఈ కార్యక్రమంలో పాల్గొన్నారు.

హైదరాబాద్: సినీ నటుడు, మాజీ ఎంపి మోహన్‌బాబును కాపు ఉద్యమ నేత ముద్రగడ పద్మనాభం మంగళవారం కలిశారు. శంషాబాద్ మండలం జల్‌పల్లిలోని మోహన్‌బాబు ఫాంహౌస్‌కు ఆయన వెళ్లి, కాపు ఉద్యమానికి మద్దతు ఇవ్వాలని విజ్ఞప్తి చేశారు. ముద్రగడ గత కొన్నిరోజులుగా నగరంలోనే బస చేసి వివిధ పార్టీల నాయకులను, సినీ నటులను కలుసుకుంటున్నారు.