హైదరాబాద్, ఏప్రిల్ 11: ఉస్మానియా యూనివర్శిటీతో పాటు తెలంగాణ యూనివర్శిటీ, పాలమూరు, మహాత్మా గాంధీ విశ్వవిద్యాలయాలు, అనుబంధ, ప్రైవేటు పిజి కళాశాలల్లో 2016-17 విద్యాసంవత్సరానికి 3ఒయుసెట్-20162 నోటిఫికేషన్‌ను జారీ చేశారు. ఈ నెల 13 నుంచి మే 7 వరకూ ఆన్‌లైన్ ద్వారా దరఖాస్తు చేసుకునే వీలుందని పిజి అడ్మిషన్స్ డైరెక్టర్ గోపాల్‌రెడ్డి చెప్పారు.

హైదరాబాద్: నగరంలోని ఎన్టీఆర్ గార్డెన్‌లో 125 అడుగుల ఎత్తులో రాజ్యాంగ నిర్మాత బిఆర్ అంబేద్కర్ విగ్రహాన్ని ఏర్పాటు చేసేందుకు తెలంగాణ సర్కారు కసరత్తు ప్రారంభించింది. విగ్రహం నిర్మాణాన్ని పర్యవేక్షించేందుకు ఉప ముఖ్యమంత్రి కడియం శ్రీహరి నేతృత్వంలో ఒక కమిటీని ముఖ్యమంత్రి కెసిఆర్ ఏర్పాటు చేస్తూ ఆదేశాలు జారీ చేశారు.

హైదరాబాద్: కేసు విచారణ సందర్భంగా కోర్టుకు వచ్చిన భార్యపై దాడిచేసిన భర్త ఆమె గొంతు కోసిన ఘటన రాజేంద్రనగర్ కోర్టు ప్రాంగణంలో సోమవారం జరిగింది. కుటుంబ కలహాల నేపథ్యంలో భర్త నాగేందర్‌పై భార్య సౌజన్య గతంలో కేసు పెట్టింది. కేసు విచారణకు హాజరైన సందర్భంగా సౌజన్యపై నాగేందర్ దాడి చేసి ఆమె గొంతు కోశాడు. ఆమె పరిస్థితి విషమంగా మారడంతో పోలీసులు వెంటనే ఆస్పత్రికి తరలించారు.

హైదరాబాద్: తెలంగాణలో ప్రస్తుతం తీవ్ర కరవు పరిస్థితులు నెలకొన్నందున రైతులను అన్ని విధాలా ఆదుకోవాలని తెలంగాణ అసెంబ్లీలో బిజెపి పక్షం నేత లక్ష్మణ్ రాష్ట్ర గవర్నర్ నరసింహన్‌కు విజ్ఞప్తి చేశారు. తొమ్మిది జిల్లాల్లో ఇటీవల తమ పార్టీ నాయకులు విస్తృతంగా పర్యటించి దుర్భిక్ష పరిస్థితులపై అధ్యయనం చేశారని ఆయన తెలిపారు. కరవు పరిస్థితులపై పార్టీ తరఫున ఒక నివేదికను రాజ్‌భవన్‌లో గవర్నర్‌కు అందజేశారు.