హైదరాబాద్, మార్చి 4: ఇంటర్మీడియట్ సెకండియర్ పరీక్షలు గురువారం ప్రారంభం అవుతున్నాయి. తొలి రోజు సెకండ్ లాంగ్వేజి పేపర్ -2 జరగనుంది. సెకండియర్ పరీక్షలకు 4 లక్షల 88 వేల 323 మంది హాజరవుతున్నారు. ఉదయం తొమ్మిది గంటలకే పరీక్ష ప్రారంభం అవుతుందని, విద్యార్థులు కనీసం గంట ముందు పరీక్ష కేంద్రాలకు చేరుకోవాలని ఇంటర్ బోర్డు అధికారులు సూచిస్తున్నారు.

హైదరాబాద్, మార్చి 4: తెలంగాణ ఉద్యమంలో ఉద్యోగుల పాత్ర కీలకమైనదని, వారి సేవలను కేసీఆర్ సర్కార్ ఎల్లప్పుడూ గుర్తుంచుకుంటుందని రాష్ట్ర పర్యాటక శాఖ మంత్రి శ్రీనివాస్‌గౌడ్ అన్నారు. రాష్ట్రప్రభుత్వం చేపట్టే సంక్షేమ పథకాలను ఉద్యోగులు సామాన్యప్రజలకు అందిస్తున్నారని ప్రశంసించారు. రాష్ట్రప్రభుత్వానికి సంక్షేమం, అభివృద్ధి రెండు కళ్లు అని ఆయన అన్నారు.

హైదరాబాద్, మార్చి 4:దేశంలో మతప్రాతిపదికన ప్రజలను, దేశాన్ని విడదీసి బీజేపీ రాజకీయ ప్రయోజనాన్ని పొందాలని చూస్తోందని పీసీసీ మాజీ అధ్యక్షుడు పొన్నాల లక్ష్మయ్య విమర్శించారు. ప్రపంచంలో అతి పెద్ద ప్రజాస్వామిక దేశమైన భారత్‌కు సుదీర్ఘ ప్రజాస్వామిక దేశాధినేత వచ్చిన సమయంలో దేశ రాజదానిలో జరిగిన మతఘర్షణలు దేశ పరిస్థితిని తెలియచేస్తున్నాయన్నారు.

హైదరాబాద్, మార్చి 4: కేసీఆర్ సర్కార్‌కు పౌరసత్వసవరణ చట్టం, జాతీయ పౌర పట్టిక పట్ల నిజంగా వ్యతిరేకత ఉంటే, ఈ నెల 6వ తేదీన గవర్నర్ ప్రసంగ పాఠంలో ఆ అంశాలను ప్రస్తావించాలని టీపీసీసీ డిమాండ్ చేసింది. టీపీసీసీ కోశాధికారి గూడూరి నారాయణ రెడ్డి మాట్లాడుతూ, రాష్ట్రప్రభుత్వం ఈ రెండు అంశాలపై స్పష్టత ఇవ్వాలన్నారు. తన వైఖరిని కుండబద్ధలు కొట్టినట్లు చెప్పాలన్నారు.