ఖమ్మం/ హైదరాబాద్: ఖమ్మం జిల్లా పాలేరు ఎమ్మెల్యే, అసెంబ్లీ పబ్లిక్ అకౌంట్స్ కమిటీ చైర్మన్ రాంరెడ్డి (లింగాల) వెంకటరెడ్డి శుక్రవారం సాయంత్రం కన్నుమూశారు. కామేపల్లి మండలం పాత లింగాలకు చెందిన ఆయన శ్వాసకోశ వ్యాధితో గత నెల 19న హైదరాబాద్‌లోని కిమ్స్‌లో చేరారు. పరిస్థితి విషమించి శుక్రవారం తుదిశ్వాస విడిచారు. 1944 మే 22న వెంకటరెడ్డి పాత లింగాలలో నారాయణరెడ్డి, కమలమ్మ దంపతులకు జన్మించారు.

ఆదిలాబాద్: తమ బ్యాంకు నుంచి రుణంగా తీసుకున్న 420 కోట్ల రూపాయలను తిరిగి చెల్లించక పోవడంతో సిర్పూర్ పేపర్ మిల్లును తాము స్వాధీనం చేసుకుంటున్నట్లు ఐడిబిఐ బ్యాంకు డిప్యూటీ జనరల్ మేనేజర్ ప్రదీప్ తెలిపారు. రుణబకాయిలు చెల్లించనందున మిల్లును స్వాధీనం చేసుకోవడం తప్ప మరో ప్రత్యామ్నాయం లేకుండా పోయిందని ఆయన చెప్పారు. ఈ మేరకు మిల్లు గేటుపై శుక్రవారం బ్యాంకు అధికారులు నోటీసులు అంటించారు.

మెదక్: మెదక్ జిల్లా ఎర్రవల్లిలో మే 15 నాటికి డబుల్ బెడ్ రూమ్ ఇళ్ల నిర్మాణాన్ని పూర్తి చేసి లబ్ధిదారులకు అందించాలని తెలంగాణ సిఎం కెసిఆర్ అధికారులను ఆదేశించారు. ఆయన శుక్రవారం ఎర్రవల్లిలో గృహనిర్మాణాలను పరిశీలించారు. గ్రామంలో బిందుసేద్యం విధానాన్ని ఆయన ప్రారంభించారు. ఈ ప్రాంతం పచ్చదనంతో వెల్లివిరిసేలా ప్రభుత్వం అన్ని చర్యలూ తీసుకుంటుందన్నారు.

వరంగల్: ఎన్నికల్లో తెరాసను ప్రజలు గెలిపించింది మంచి పాలన అందించడానికే తప్ప విపక్షాల గొంతు నొక్కేయడానికి కాదని టి.టిడిపి నేత రేవంత్ రెడ్డి అన్నారు. వరంగల్ మున్సిపల్ కార్పొరేషన్ ఎన్నికల సందర్భంగా ఆయన శుక్రవారం ఇక్కడ ప్రచారం చేసిన సందర్భంగా మాట్లాడుతూ, తెరాస గెలిచాక తెలంగాణ ప్రజల ఆశలను సిఎం కెసిఆర్ వమ్ము చేస్తున్నారని ఆరోపించారు.