హైదరాబాద్, ఆగస్టు 26: ముఖ్యమంత్రి కే. చంద్రశేఖర్ రావు పాలనలో నిరుద్యోగులకు నిరాశే మిగిలిందని కాంగ్రెస్ ఎమ్మెల్యే టీ. జీవన్ రెడ్డి విమర్శించారు. నాలుగున్నర సంవత్సరాలుగా ఖాళీగా ఉన్న రెండు లక్షల ఉద్యోగాలను ఎందుకు భర్తీ చేయలేదో ముఖ్యమంత్రి చెప్పాలని ఆయన ఆదివారం విలేఖరుల సమావేశంలో డిమాండ్ చేశారు. కొత్త జిల్లాలను ఆమోదింపచేసుకోవడానికే కేసీఆర్ జోనల్ విధానాన్ని తెరపైకి తెచ్చారని ఆయన విమర్శించారు.

హైదరాబాద్, ఆగస్టు 26: రాఖీ పౌర్ణమి సందర్భంగా పీసీసీ అధ్యక్షుడు ఉత్తమ్‌కుమార్ రెడ్డి మహిళా కాంగ్రెస్ నాయకులు రాఖీలు కట్టారు. మహిళా కాంగ్రెస్ రాష్ట్ర అధ్యక్షురాలు నేరెళ్ళ శారద నేతృత్వంలో పలువురు మహిళా నేతలు ఉత్తమ్ నివాసానికి వెళ్ళి రాఖీలు కట్టి శుభాకాంక్షలు తెలిపారు. ఈ సందర్బంగా ఉత్తమ్ వారికి కృతజ్ఞతలు చెప్పారు.

కరీంనగర్, ఆగస్టు 25: హైదరాబాద్‌లో 25లక్షల మందితో భారీ బహిరంగ సభ నిర్వహిస్తున్నాం. జన ప్రవాహంతో కూడిన ఈసభ చారిత్రాత్మకం కానుంది అని రాష్ట్ర ఆర్థిక శాఖ మంత్రి ఈటల రాజేందర్ పేర్కొన్నారు. ఎన్నికల ప్రణాళికలో పొందుపర్చిన అంశాలను 99.9శాతం అమలు చేశామని, దేశంలో ఎక్కడా లేనివిధంగా 37 కులాల వారికి 10ఎకరాల్లో రూ.10కోట్లతో ఆత్మగౌరవ కేంద్రాలను హైదరాబాద్ నగరంలో నిర్మిస్తుమని అన్నారు.

శ్రీశైలం ప్రాజక్టు, ఆగస్టు 25: ఎగువ కృష్ణా పరివాహక ప్రాంతం నుంచి శ్రీశైలం జలాశయానకి వస్తున్న వరద నీటి ప్రవాహ ఉద్ధృతి తగ్గడంతో శనివారం రెండు గేట్లను మాత్రమే పది అడుగుల మేర ఎత్తి దిగువకు నీటిని విడుదల చేస్తున్నారు. జూరాల వరదగేట్ల నుంచి 58.363 క్యూసెక్కులు, విద్యుత్ ఉత్పత్తి ద్వారా 40వేల క్యూసెక్కులు, సుంకేసుల ద్వారా 19,770 క్యూసెక్కులు మొత్తం 1,20,133 క్యూసెక్కుల నీరు జలాశయంలోకి వస్తుంది.