రియో ఒలింపిక్స్‌లో తప్పకుండా పతకాలు సాధించి పెడతారన్న అభిమానుల ఆశలను వమ్ము చేసిన టెన్నిస్ స్టార్లంతా ఫ్లాప్ షోలతో నిరాశ పరిచారు. సానియా మీర్జా, లియాండర్ పేస్, రోహన్ బొపన్న, ప్రార్థనా తొంబారే ఘోరంగా విఫలమయ్యారు. ప్రత్యేకించి, మిక్స్‌డ్ డబుల్స్‌లో సానియా, బొపన్న జోడీ చేతులెత్తేసిన విధానం అందరినీ ఆవేదనకు గురి చేసింది.

రెజ్లింగ్‌లో సాక్షి మాలిక్‌ను మినహాయిస్తే మిగతా వారంతా నిరాశ పరిచారు. మహిళల 58 కిలోల ఫ్రీస్టయిల్‌లో సాక్షి కాంస్య పతకాన్ని సాధించి పరువు నిలిపింది. 48 కిలోల ఫ్రీస్టయిల్ ప్రీ క్వార్టర్స్‌లో వినేష్ ఫొగట్ గాయపడి నిష్క్రమించింది. లండన్ ఒలింపిక్స్ కాంస్య పతక విజేత యోగేశ్వర్ దత్, సందీప్ తోమర్, రవీందర్ ఖత్రి, హర్దీప్ సింగ్ దారుణంగా విఫలమయ్యారు.

టీనేజ్‌లోనే ఒలింపిక్స్‌కు అర్హత సంపాదించిన అదితి అశోక్ ఆకట్టుకుంది. తన స్థాయికి మించి కష్టపడిన ఆమె 41వ స్థానంతో ముగించినప్పటికీ, తనకు ఉత్తమ భవిష్యత్తు ఉందని నిరూపించింది. పురుషుల విభాగంలో చౌరసియా 50, అనిర్బాన్ లాహిరి 57 స్థానాలకు ఒదిగిపోయారు.

తెలుగు తేజం పివి సింధుకు మహిళల బాడ్మింటన్‌లో రజతం.. ఎవరూ పట్టించుకోని సాక్షి మాలిక్‌కు మహిళల రెజ్లింగ్‌లో కాంస్యం.. రియో ఒలింపిక్స్‌లో మేజర్ ఈవెంట్స్ ముగిసే సమయానికి భారత్ సాధించిన పతకాలివి. ఏదైనా అద్భుతాలు జరిగితే తప్ప మిగిలిన ఈవెంట్స్‌లో పతకాలు వస్తాయన్న ఆశ లేదు. గతంలో ఎన్నడూ లేనంత భారీ బృందం రియోకి వెళ్లింది. 118 మంది పోటీపడడం సంఖ్యా పరంగా ఒక రికార్డు. సింధు ప్రతిభ.. సాక్షి పోరాటం..