చట్టసభలకు వెళ్లిన ప్రజా ప్రతినిధులు ఎంతో క్రమశిక్షణతో మెలిగి ప్రజల సమస్యలపై ఓపికగా మాట్లాడాలి. ఇతర సభ్యులు మాట్లాడే విషయాలను శ్రద్ధగా వినాలి. సభ జరుగుతున్నంత సేపు 120 కోట్ల మంది భారతీయులు ఒక కంట తమను కనిపెడుతున్నారని అప్రమత్తంగా ఉండాలి. ఇటీవల కాలంలో మన దేశంలో చట్టసభలు రాజకీయ పార్టీ నేతల వ్యక్తిగత అజెండా అమలుకు, ఘర్షణకు వేదికలుగా తయారయ్యాయి. ఇది చాలా దురదృష్టకరమైన పరిణామమని చెప్పవచ్చును.

ఉగ్రవాదం, తీవ్రవాదం జాతీయ ప్రయోజనాలను విచ్ఛిన్నం చేస్తాయి. అభివృద్ధి కుంటుపడుతుంది. సమాజంలో అశాంతి నెలకొంటుంది. హింసకు ప్రతి హింస సమాధానం కాదు. మనం ప్రజాస్వామ్య దేశంలో ఉన్నాం. ఉగ్రవాదం, తీవ్రవాదం కేవలం భారత్ లేదా ఆంధ్ర, తెలంగాణ రాష్ట్రాల సమస్య కాదు. ఇది అంతర్జాతీయ సమస్యగా పరిణమించింది. ప్రస్తుతం ఆంధ్ర, తెలంగాణలో వామపక్ష తీవ్రవాదం మెల్లిమెల్లిగా మళ్లీ విస్తరిస్తోంది.

టైగర్ ఫారెస్ట్, జింకల అటవీప్రాంతం అంటూ మన దేశంలో ప్రత్యేకంగా అడవులు ఉన్నాయి, అలాగే హైదరాబాద్ ‘ఉగ్రవాదుల అడవి’గా మారిపోయింది. దేశంలో ఏ ప్రాంతంలో ఉగ్రవాద దాడి జరిగినా దానికి మూలాలు హైదరాబాద్‌లోనే ఉంటున్నాయి. రాజకీయ కారణాల మూలంగా ఉగ్రవాదులకు ప్రభుత్వం అనుకూలంగా ఉంటుందన్న ప్రచారం జరుగుతోంది. అందుకే హైదరాబాద్ ఉగ్రవాదులకు కేంద్రంగా మారిపోయింది.

తీవ్రవాదం, ఉగ్రవాదం, విచ్చిన్నకర కార్యకలాపాలకు ప్రస్తుతం అక్కడా ఇక్కడా అని ఏమీ లేదు. ఇది ప్రపంచ వ్యాప్తంగా విస్తరించుకుంటూ పోతోంది. కొనే్నళ్లగా మతోన్మాద తీవ్రవాదం పెరిగిపోయింది. ప్రభుత్వం తీవ్రవాదం, ఉగ్రవాదం ముసుగులో ఉన్న అరాచక శక్తులను ఉక్కుపాదంతో అణచివేయాలి. ఇటీవల పారిస్‌లో ఉగ్రవాదుల దాడి ప్రపంచాన్ని వణికించింది. మాలెలో కూడా ఉగ్రవాదులు విరుచుకుపడ్డారు.