జోనల్ విధానాన్ని రద్దు చేయాలనుకోవడం అనాలోచిత చర్య. కొత్తగా తెలంగాణ రాష్ట్రం ఏర్పాటైనప్పటికీ జిల్లాల్లో సామాజికంగా, ఆర్థికంగా అంతరాలు ఉన్నాయి. జోనల్ విధానాన్ని తీసి వేయడంతో అనారోగ్యకరమైన పోటీ వచ్చే అవకాశం ఉంది. దీనివల్ల ప్రభుత్వ ఉద్యోగ నియామకాల్లో పూర్తిస్థాయి న్యాయం జరగదు.

ఉమ్మడి రాష్ట్రంలో తెలంగాణ ప్రాంతం వారికి ఉద్యోగ నియామకాలలో అన్యాయం జరుగకుండా జోనల్ వ్యవస్థను ప్రవేశపెట్టారు. అయితే తెలంగాణ రాష్ట్రం ఏర్పడటంతో ఇంకా జోనల్ వ్యవస్థను కొనసాగించాల్సిన అవసరం లేదు. అలాగని జోనల్ వ్యవస్థ రద్దువల్ల తిరిగి రాష్ట్రంలో మరెవరికీ అన్యాయం జరుగకుండా చూడాల్సిన బాధ్యత ప్రభుత్వంపై ఉంది.

ఉద్యోగ నియామకాలు, విద్యా రంగంలో సీట్ల కేటాయింపుకు సంబంధించి ఉమ్మడి ఆంధ్రప్రదేశ్‌లో 1975కు ముందు వచ్చిన ఉద్యమాలను దృష్టిలో పెట్టుకుని ఆరు జోన్లు చేశారు. ఇప్పుడు 371-డి అమలులో ఉంది. రాష్ట్ర విభజన జరిగినా 371-డి బంధం మాత్రం రెండు తెలుగు రాష్ట్రాలను కలిపి ఉంచుతోంది. హైదరాబాద్ ఉమ్మడి రాజధానిగా పదేళ్లు ఉంటుంది. అంటే 2024 తర్వాతనే జోనల్ వ్యవస్థకు చరమగీతం పాడే అవకాశం ఉంటుంది.

ప్రాంతీయ అసమానతలు పూర్తిగా తొలగేవరకు ఆంధ్రప్రదేశ్‌లో నాలుగు జోన్ల వ్యవస్థ కొనసాగి తీరాల్సిందే. తెలంగాణ రాష్ట్రంలో జోనల్ వ్యవస్థకు చరమగీతం పాడారంటూ ఇక్కడ కూడా అదే విధానం కొనసాగించే ప్రయత్నం ఎంతమాత్రం సహేతుకం కాదు. నదీతీర ప్రాంతాల్లో పుష్కలంగా ఆర్థిక వెసులుబాటు ఉండటంతో ఆ ప్రాంతంలో విద్య, సాంస్కృతిక, కళారంగాలతోపాటు నాగరికత పరిఢవిల్లుతూ వచ్చింది.