నోట్లను రద్దుచేయడం వెనుక ఉద్దేశం మంచిదే అయినప్పటికీ, అమలు చేసేందుకు చేపట్టిన విధానం మాత్రం సరైంది కాదు. భారతదేశంలో కొంతమంది బడాబాబుల వద్ద పేరుకుపోయిన నల్లధనాన్ని వెలికితీయాలని ప్రభుత్వం భావించడంలో తప్పులేదు. దేశంలో ప్రతి పౌరుడి ఆదాయం చట్టానికి లోబడి ఉండాలన్నది కేంద్రం ఉద్దేశంగా స్పష్టమవుతోంది. నీతివంతమైన పాలనను ప్రజలకు అందించాలన్నది ప్రధాని నరేంద్ర మోదీ ఆలోచించి ఉండవచ్చు.

నల్లధనాన్ని నిర్మూలించేందుకు 500, వెయ్యి రూపాయల నోట్లను రద్దు చేసినట్లు ప్రధాని నరేంద్ర మోదీ ప్రకటించారు. బాగానే ఉంది కానీ రెండు వేల రూపాయల నోటును ఎందుకు తెచ్చినట్లు? ఇది నల్లధనాన్ని ప్రోత్సహించడం కాదా? స్విట్జర్లాండ్ తదితర దేశాల్లో మూలుగుతున్న నల్లధనాన్ని తీసుకుని రావడంలో విఫలమైన కేంద్ర ప్రభుత్వం దానిని కప్పిపుచ్చుకోవడానికి పెద్దనోట్లను రద్దు చేసింది.

పెద్దనోట్లను రద్దు చేసినంత మాత్రాన అవినీతి అగదు.. నకిలీ కరెన్సీ బెడద తప్పదు.. భారత్‌ను అవినీతిరహిత దేశంగా చూడాలనే కరెన్సీ మార్పు జరిగిందని భావిద్దాం. అయతే నల్లధనాన్ని వెలికి తీసినంత మాత్రాన దేశంలో అవినీతికి అడ్డుకట్ట పడుతుందని అనుకోవడానికి లేదు. రూ. వెయ్యి, ఐదువందల కరెన్సీ రద్దయి వారం రోజులు కూడా కాలేదు, అప్పుడే కశ్మీర్, గుజరాత్‌లోనూ రెండువేల రూపాయల నకిలీ నోట్లు బయటపడ్డాయి.

నోట్ల రద్దుతో ఏ రంగంపై ఎలాంటి ప్రభావం పడబోతుందో, ఏ మార్కెట్‌పై ఎలాంటి ప్రభావం ఉంటుందో ఇప్పటికి ఇప్పుడే చెప్పలేం. ఏ ఆర్థిక వేత్త కూడా వంద శాతం ఇలానే జరుగుతుంది అని చెప్పలేరు. ఏ మంచి పని చేయాలన్నా వంద శాతం మంచే జరుగుతుంది అని చెప్పలేం. ప్రభావం ఏ విధంగానైనా ఉండవచ్చు. దొంగ సొమ్ము, నల్ల ధనం దేశానికి, సమాజానికి మంచిది కాదు.