కొత్త జిల్లాలతో తెలంగాణలో కొత్తశకం ప్రారంభం అవుతుంది. జిల్లాల పరిణామం చిన్నగా ఉండడంవల్ల పాలన ప్రజలకు మరింత చేరువ అవుతుంది. ప్రజల మేలుకోసమే జిల్లాల ఏర్పాటు కానీ రాజకీయ కోణంలో కాదు. ప్రభుత్వ పథకాలు అర్హులైన పేదలకు చేరేందుకు, పేదల జీవితాల్లో వెలుగులు నిండాలని అంబేద్కర్ స్ఫూర్తితో ముఖ్యమంత్రి కెసిఆర్ జిల్లాల పునర్విభజనకు పూనుకున్నారు.

తెలంగాణ రాష్ట్ర ప్రభుత్వం చేపట్టిన కొత్త జిల్లాలు, కొత్త డివిజన్లు, కొత్త మండలాల ఏర్పాటు శాస్ర్తియంగా లేదు. ముఖ్యమంత్రి చంద్రశేఖరరావు ఏకపక్షంగా నిర్ణయం తీసుకున్నారు. ప్రభుత్వంలో అధికారపక్షం, విపక్షాలు, స్వచ్ఛందసేవా సంస్థలు, ప్రజలు తదితరులంతా భాగస్వామ్యులే. ప్రభుత్వం తీసుకునే అత్యంత ముఖ్యమైన నిర్ణయంలో గోప్యత అవసరం ఏముంటుంది. సినిమాల తరహాలో చివరిక్షణం వరకు ఉత్కంఠ కలిగించారు.

పార్లమెంటు నియోజకవర్గం ప్రాతిపదికన జిల్లాలు ఏర్పాటు చేసి ఉంటే బాగుండేది. పరిపాలన వికేంద్రీకరణలో భాగంగా కొత్త జిల్లాల ఏర్పాటు మంచిదే అయినా, ఈ ప్రక్రియను శాస్ర్తియపరమైన అధ్యయనం లేకుండా చేయడం తొందరపాటు చర్య. తెలంగాణ రాష్ట్రంలో 10 జిల్లాలను 31 జిల్లాలుగా విభజించారు. కొత్త జిల్లాలను ఖరారు చేయకముందు జ్యుడీషియల్ కమిటీని నియమించి హేతుబద్ధంగా జిల్లాల విభజన చేసి ఉంటే బాగుండేది.

పరిపాలనా సౌలభ్యంకోసం తెలంగాణ ప్రభుత్వం ఏర్పాటు చేసిన కొత్త జిల్లాలు ప్రజలకు ముఖ్యం కాదు.. ప్రజలకు అందే సౌకర్యాలు, పరిపాలన ముఖ్యం. ప్రజలకు ఏ మేరకు సేవలందిస్తున్నాం, కొత్త జిల్లాలవల్ల వారికి కలిగే ప్రయోజనాలు ఏమిటి? జిల్లాలకు ఆదాయ, వ్యయ, వనరులపై సమగ్ర అవగాహన ప్రజల్లో ఉండాలి. ప్రజలకు అవగాహన కల్పించి కొత్త జిల్లాలను ఏర్పాటు చేస్తే బాగుండేది.