ఒక రాజకీయ పార్టీ నుండి ఎన్నికైన ప్రజాప్రతినిధి ఎవరైనా పార్టీ మారడం అనేది నైతికత, రాజ్యాంగపరమైన అంశాలకు లోబడి ఉంటుంది. టిడిపి పరిస్థితి తెలంగాణలో ఒక రకంగా, ఆంధ్రప్రదేశ్‌లో మరోరకంగా ఉంది. తెలంగాణలో టిడిపి ఎమ్మెల్యేలు, ఇతర ప్రజాప్రతినిధులు అధికార టిఆర్‌ఎస్‌లో చేరుతున్నారు. అదే విధంగా ఆంధ్రప్రదేశ్‌లో వైకాపాకు చెందిన ఎమ్మెల్యేలు ఇతర ప్రజాప్రతినిధులు అధికార టిడిపిలో చేరుతున్నారు.

తెలుగుదేశం పార్టీకి తెలంగాణలో ఎలాంటి భవిష్యత్తు లేదు. ప్రాంతీయ పార్టీలు ఒక్క రాష్ట్రానికే పరిమితం అవుతాయి. అదే విధంగా టిడిపి ఆంధ్రకే పరిమితం అవుతుంది. ఎవరేమన్నా జరిగేది ఇదే. టిడిపిని తెలంగాణలో బతికించేందుకు మా శక్తి వంచన లేకుండా ప్రయత్నించాం. గ్రేటర్ హైదరాబాద్ ఎన్నికల్లో అంత విస్తృతంగా ప్రచారం చేసినా 150 డివిజన్లకు కేవలం ఒకే ఒక డివిజన్‌లో గెలవడం అంటే పార్టీ పరిస్థితి ఏమిటో అర్థం అవుతుంది.

రాజకీయ నాయకులు పార్టీలు మారడం మంచి సంప్రదాయం కాదు. తనను నమ్ముకున్న కార్యకర్తలు, ప్రాతినిధ్యం వహించే నియోజకవర్గం ప్రజల విశ్వాసం కోల్పోతారు. కానీ తమ స్వార ప్రయోజనాల కోసమే పార్టీలను మారుతున్నారనడంలో సందేహం లేదు. ఎందుకంటే రాజకీయ పార్టీల్లో పారదర్శకత లేదు. ఒక పార్టీ బ్యానర్‌పై గెలిచి మరో పార్టీలో చేరడం మానవతా విలువలను కోల్పోవడమే. అందుకే పార్టీ ఫిరాయింపులపై సమగ్ర చట్టం తేవాల్సిన అవసరం ఉంది.

తెలంగాణలో తెలుగుదేశం పార్టీ కనుమరుగైనట్లేనని చెప్పవచ్చు. తెలంగాణ రాష్ట్ర సమితికి కాంగ్రెస్ పార్టీయే ప్రత్యామ్నాయం. బీహార్ ముఖ్యమంత్రిగా లాలూ ప్రసాద్ యాదవ్ విజయపరంపర కొనసాగించినా, జార్ఖండ్‌లో చతికిలపడ్డారు. ప్రాంతీయ పార్టీలు ఆయా రాష్ట్రాలకే పరిమితం అవుతున్నాయి. ఇది దేశ వ్యాప్తంగా కనిపిస్తున్న వాస్తవాలు. తెలంగాణ రాష్ట్ర సమితి ‘హవా’ ఇప్పుడు కనిపిస్తున్నా, అదే శాశ్వతంగా ఉండదు.