బరువు తగ్గడం అంత వీజీ ఏం కాదు. లావుగా ఉన్నవారికి ఇదో పెద్ద ఛాలెంజ్. బరువు తగ్గాలని ఉన్నా, చాలామంది ఆహార నియమాలు పాటించరు. వ్యాయామం చేయాలంటే బద్ధకం. అలాంటివారికో సలహా. రోజూ ఓ ఫోటో తీసుకోవడం. అది కూడా తలనుంచి కాళ్లవరకూ శరీరం మొత్తం కనబడేలా. అలా రోజూ ఫోటోలు తీసుకుని చూసుకుంటూ ఉంటే అవే సన్నబడేందుకు మోటివేట్ చేస్తాయట. స్పెయిన్‌లోని అలికాంటే యూనివర్శిటీ చేసిన ఓ అధ్యయనంలో ఈ విషయం తేలిందట.

విద్యుచ్ఛక్తిని ఆదా చేసే ఉపకరణాల తయారీలో పేరొందిన సంస్థ టెస్లా- ఓ కొత్త కారుతో మార్కెట్లోకి రాబోతోంది. దీని పేరు టెస్లా మోడల్ 3. ఇదో ఎలక్ట్రిక్ కార్. మార్కెట్లో ఇప్పటికే ఉన్న అన్ని రకాల కార్ల కంటే ఇది చౌకే కాదు..ఏ ఇతర లగ్జరీ కార్లకూ తీసిపోని విధంగా దీన్ని రూపొందించారట. ఇది మార్కెట్లోకి వస్తే, సామాన్యుడు సైతం కారెక్కగలుగుతాడన్నది నిపుణుల ఉవాచ.

వైఫై గురించి అందరికీ తెలుసు. దీనిని మించిన సాంకేతిక పరిజ్ఞానం త్వరలో రాబోతోంది. దాని పేరే లీఫై. మన ఇళ్ళలో కాంతులు విరజిమ్ముతున్న బల్బులే ఇకపై ఈ సరికొత్త సాంకేతిక పరిజ్ఞానాన్నీ మోసుకు రాబోతున్నాయి. ఎడిన్‌బర్గ్ యూనివర్శిటీలో మొబైల్ కమ్యూనికేషన్స్ విభాగంలో పనిచేస్తున్న ప్రొఫెసర్ హరాల్డ్... లీఫై సృష్టికర్త. ఆయన ఏం చెబుతున్నారంటే...రాబోయే కాలంలో ఎలక్ట్రిక్ బల్బులే బహుళ ప్రయోజనాలకు ఉపయోగపడతాయట.

సాంకేతిక పరిజ్ఞానం రోజురోజుకీ కొత్త పుంతలు తొక్కుతోంది. సరికొత్త ఆవిష్కరణలు వెలుగుచూస్తున్నాయి. మొబైల్ ఫోన్ వెలుగుజూసిన రెండున్నర దశాబ్దాల్లో టెక్నాలజీ మానవ జీవితంపై చూపిన ప్రభావం మాటల్లో వర్ణించలేనిది. ఒకప్పుడు బ్యాంక్ ఖాతాలోంచి డబ్బు డ్రా చేయాలన్నా గంటల కొద్దీ క్యూలో వేచి ఉండాల్సిన పరిస్థితి. మరోచోటికి డబ్బును ట్రాన్స్‌ఫర్ చేయాలంటే చెక్కులో, మనీయార్డర్లో గతి.