మోడలింగ్ నుంచి వెండితెరపైకి అడుగుపెట్టిన మేఘా ఆకాష్ ప్రస్తుతం తెలుగు, తమిళంలో వరుసగా ఆఫర్లను చేజిక్కించుకుంటూ ఆడిపాడుతోంది. టాలీవుడ్‌తో పాటు కోలీవుడ్ ప్రేక్షకులు కూడా ఆమె చిత్రాలపై మోజు పెంచుకుంటున్నారు. పరిశ్రమ కూడా ఈ అమ్మడినే ప్రోత్సహించడానికి ముందుకు వస్తోంది. ‘అ..ఆ..’ చిత్రంతో యాభై కోట్ల క్లబ్‌లో అడుగుపెట్టిన యువ హీరో నితిన్, ప్రస్తుతం భారీ బడ్జెట్‌తో తెరకెక్కుతున్న ‘లై’ చిత్రంలో నటిస్తున్నాడు. యాక్షన్ డ్రామాగా రూపుదిద్దుకుంటున్న ఈ చిత్రానికి హాను రాఘవపూడి దర్శకత్వం వహిస్తున్నారు. ప్రస్తుతం ఈ చిత్రం విదేశాల్లో షూటింగ్‌ని జరుపుకుంటోంది. నితిన్ కెరీర్‌లోనే భారీ బడ్జెట్ చిత్రంగా తెరకెక్కుతున్న ఇందులో నితిన్‌కు జోడీగా మేఘా ఆకాష్ నటిస్తోంది. త్వరలోనే ఈ చిత్రం పూర్తికానుండటంతో నితిన్ తన తదుపరి చిత్రం మీద దృష్టి సారించినట్లు తెలిసింది. ఈ చిత్రాన్ని ‘రౌడీఫెలో’ ఫేం కృష్ణ చైతన్య దర్శకత్వంలో పవన్ కళ్యాణ్, త్రివిక్రమ్ నిర్మిస్తుండటం విశేషం. ఈ చిత్రానికి సంబంధించి ప్రస్తుతం నటీనటుల ఎంపిక జరుగుతోంది. ఇందులో కూడా నితిన్ సరసన ‘లై’ ఫేం మేఘా ఆకాష్‌నే ఎంపిక చేసుకోవాలని నిర్ణయించుకున్నట్లు సమాచారం. వాహ్..మేఘా!