ప్రపంచ వేదిక!
Published Saturday, 6 January 2018
నాదయిన
ఒక గొంతు కావాలి
నాదయిన పాట పాడాల
నా మూలాలను
తర్జుమా చేసే
ఒక వేదిక కావాలి
నా చొక్కాలోని
డిజైన్లు కూడా
నా బతుకు రంగుల్ని
మీ కళ్లపై
ప్రతిఫలించాలి
ఒకే తానులో
ముక్కలమైనా
చెక్కలయిన
నా హృదయపు పలక మీద
నా వెతల అక్షరాలను
నా ఆత్మగౌరవ యాసను
నా జీవన మూలాల శ్వాసను
మీరూ ప్రేమతో దిద్దుకోవాలి
తెరిచిన తలుపులగుండా
ఒక పూల వంతెనను
నిర్మించుకుని
మన కలలు
కరచాలనం చేసుకోవాలి
మన హృదయాలు
ఒకటిగా కౌగిలించుకోవాలి
తెలుగు మాలలో అల్లుకున్న
తీరొక్క పూల గుబాళింపయి
నువ్వూ నేను
సరికొత్త జీవన పరిమళాలతో
పులకించిపోవాలి
ప్రపంచ వేదిక మీద
మన తెలుగు తేజం
విశ్వకేతనమై రెపరెపలాడాలి!’