ప్రకృతి కవ్విస్తోంది
Published Sunday, 22 January 2017ప్రకృతిని సందర్శిస్తూ ఉంటే మనసు పరవశిస్తోంది
రంగురంగుల సీతాకోకచిలుకలా
పూవుపూవునా వాలి అందాన్ని చూడాలని వుంది
ఆకాశంలో ఎగురుతూ పండు పండునా వాలుతూ
రామచిలకలా దోరపళ్ళ రుచులు చూడాలని వుంది
కొమ్మకొమ్మకి ఎగబాకుతూ ఎగురుతూ
కుచ్చుతోక ఆడిస్తూ ముచ్చటైన మూడు గీతలతో
ముద్దుగొలిపే రామానుగ్రహం పొందిన ఉడుతలా
కొమ్మకొమ్మకి ఎగిరి పళ్ళు కాయలు రుచి చూడాలని వుంది
ఎన్నో రకాల పువ్వుల్లా అరవిరిసి వాసనలు వెదజల్లాలని వుంది
లేత ఆకుపచ్చ రంగులో గాలి తాకిడికి
రెపరెపలాడుతూ అల్లల్లాడే లేత ఆకుల్లా వెలగాలని వుంది
పండ్లతో నిండుగా వుండి అందరికీ నీడనిచ్చే
పచ్చని నిండైన చెట్టులా నిలవాలని వుంది
అందరికీ దాహార్తిని తీరుస్తూ కొండకోనల్లో
జలజలపారే సెలయేరుల్లా పరవశిస్తూ పారాలని వుంది
ఉత్సాహంతో గంతులేసే లేగదూడలా గెంతాలని వుంది
ఇదీ అదీ అని వేరువేరుగా చెప్పేదేముంది?
ప్రకృతిలో అణువణువులో చేరి పరవశించాలని ఉంది