బంగ్లాదేశ్‌లోని తురగ్ నదీ తీరంలో లక్షలాది మంది ముస్లింలు జనవరిలో కలసి పండుగ (జాతర) జరుపుకోవడం ఆనవాయితీ. ప్రపంచంలోనే ఇది ఒక జాతి, మతం వారు జరుపుకునే అతిపెద్ద జాతరగా ప్రసిద్ధి చెందింది. ఇక్కడికి జనం ఎలా వస్తారంటే రైళ్లు కిక్కిరిసిపోయి లోపలా, పైనా ప్రయాణికులతో నిండిపోయేలా తరలివస్తారు. అలా వచ్చిన రైళ్లు ఇవి. చోటుకోసం ఈ ప్రయాణికుడిలా ఇలా ఒక రైలు మీంచి మరో రైలుపైకి గెంతడం అక్కడ సర్వసాధారణం.

పసిపిల్లలకు పాలుపట్టడం మురిపమే. తల్లిలేని ఓ పందికూనకు ఇలా సీసాతో పాలుపడుతూ మురిసిపోతోంది ఓ అమ్మడు. చైనాలోని జిన్‌జింగ్ ప్రాంతంలో ఈ దృశ్యం కంటపడింది.

వ్యవసాయ పనులు చేసే వారికి లేదా అవగాహన ఉన్నవారికి ట్రాక్టర్ ప్రయోజనాలు ఏమిటో తెలుస్తుంది. ఇక్కడ కనిపిస్తున్న గడ్డితో చేసిన ట్రాక్టర్‌కూ ఓ విశేషం ఉంది. పర్యాటకులను ఆకట్టుకునేందుకు ఇలా గడ్డికట్టలతో ట్రాక్టర్‌ను రూపొందిస్తూంటారు. వైన్‌టేస్టింగ్ కేంద్రంగా చెప్పుకునే ‘సాన్‌కెర్రా’లో ఇలాంటి ట్రాక్టర్లు ఎక్కువగా ఏర్పాటు చేస్తారు.

ఏదో ఒకటి కొత్త విషయం కనుగొంటేనే అందర్నీ ఆకర్షించవచ్చు. తామేమిటో నిరూపించుకోవచ్చు. జపాన్‌కు చెందిన ‘ఆన్-ఓర్ట్ కార్పొరేషన్’ ఆలోచన కూడా అదే. పదేళ్లపాటు కష్టపడి భారీ డైనోసార్ రోబోలను తయారు చేసింది. ప్రత్యేక శిక్షణ పొందిన కొందరిని ఎంపిక చేసి వాటిని నిర్వహించేలా తీర్చిదిద్దింది. ఇప్పటివరకు 13 డైనోసార్ రోబోలను సిద్ధం చేశారు. తాజా రోబో ‘టైరనోసారస్’ రకానికి చెందినది.