ఎన్నో ఏళ్ల క్రితం మనం చదువుకున్న కాలేజీ, మొదటిసారి ఉద్యోగంలో చేరిన ఊరు, ఇలాంటి వాటిని దర్శించినప్పుడు అంతా నిన్న మొన్న జరిగినట్లు అనిపించడం సహజం. తెలియకుండానే కాలం గడిచిపోతుంది. కాని మిగిలిన కాలం అయినా సద్వినియోగం చేసుకోవాలని చెప్పిన ‘ఓ చిన్నమాట’ ఎంతో బావుంది. ‘చిత్రం భళారే విచిత్రం’ కవిత బాగుంది.

మహిళలు వివిధ రంగాలలో ఎలా దూసుకు వెళుతున్నారో ‘సాగర కన్యలు’ వ్యాసం మరింతగా ప్రస్ఫుటింపజేసింది. ఈ వ్యాసాన్ని ఆడపిల్లలందరూ చదివి జీవితంలో వారు కూడా అలా ఉన్నత విద్యార్జనలోని లోతుపాతులను గ్రహించి అత్యున్నత శిఖరాలకు ఎదగాలని ఆశిస్తున్నాం. విజయవాడ ఆకాశవాణిలో దాదాపు యాభై ఏళ్ల క్రితం ప్రసారమయిన రాగరంజిత, రసరమ్యమైన గేయాలు ఎప్పుడూ గుర్తుంచుకోదగ్గవి. నిత్యం వినదగ్గవి.

అందలమెక్కిన అందరివాడు ‘కవర్‌స్టోరీ’ మాకెంతో నచ్చింది. ఉపరాష్టప్రతి వెంకయ్య నాయుడు గారు గతంలో ఎన్నికల ప్రచారానికి అనంతపురానికి వచ్చినపుడు వారి ఉపన్యాసం వినడం జరిగింది. ఆయన గొప్ప ఉపన్యాసక చక్రవర్తి. ఏ భాషలోనైనా అనర్గళంగా ఉపన్యసించి అందరినీ మంత్రముగ్ధుల్ని చేయగల వ్యక్తి. ఆయన ఆంధ్రప్రదేశ్‌కు అందించిన చేయూత మరువరానిది.
-కైప నాగరాజు (అనంతపురం)
నమ్మకం

ఇదంతా ఓ ఉద్యానవనం... ప్రకృతి సోయగాల మధ్య.. అందంగా కనిపిస్తున్న ఆ ఉద్యానవనమే ‘ఉద్దానం’గా చెబుతారు.. అందమైన ఆ లోకంలో ఇప్పుడు విషాదం తెరకమ్మేసింది.. ప్రపంచంలో నాలుగైదు చోట్ల మాత్రమే సవాలు విసురుతున్న అరుదైన కిడ్నీ వ్యాధి ప్రజల ప్రాణాలు తోడేస్తోంది. గ్రామాలకు గ్రామాల్లో కుటుంబాలకు కుటుంబాలు దీని బారినపడి ప్రాణాలు కోల్పోతున్నారు. ప్రభుత్వ లెక్కల ప్రకారమే మృతుల సంఖ్య వేలల్లో ఉంది.