మహాయోగి, ధర్మమూర్తి, ఆదర్శ గురువు బ్రహ్మశ్రీ కందుకూరి శివానంద గారిపై వ్యాసం ద్వారా అనేక విషయాలు తెలుసుకొని ఆనందించాం. ముఖాముఖిలో ‘అద్దెకున్నవాడు వారసుడ్ని చూస్తానంటే ఇల్లుగలాయన ఊరుకోడు’ అన్న సమాధానం భలేగా నవ్వించింది! మనం కోపంలో, ఆవేశంలో తిడతాం. శాపనార్థాలు పెడతాం. అందువల్ల కలిగే అనర్థాన్ని ‘సండే గీత’లో గొప్పగా వివరించారు. టాబ్లాయిడ్ రూపంలో ఆదివారం ఆంధ్రభూమి ముచ్చటగా ఉంది.

దేశం కోసం ప్రాణ త్యాగానికి సిద్ధపడిన దేశభక్తులకు కారాగారంలో తినలేని తిండిని పెడుతూ, అదే సాంఘిక దురాచారాలైన దొంగతనం, దోపిడీలు, మానభంగాలు, దొమీలు లాంటి నికృష్ట నేరాలు చేసిన వారికి రాజభోగాలా? - చదువుతూంటే మనిషై పుట్టిన బ్రిటీష్ దొరలకు మానవత్వం కనుమరుగై ఇంత కాఠిన్యమెలా కలిగిందో అని బాధ వేసింది. మన దేశంలో మన వారిని ఇంత క్షోభపెట్టిన చరిత్రను యథాతథం ప్రపంచానికి విస్తృతంగా ప్రచారం చేయాలి.

పెద్దవాళ్లు ఏది ఆచరిస్తే దానినే చిన్నవాళ్లు అనుసరిస్తారని భగవద్గీత బోధించింది. మంచి మర్యాదలు, పలకరింపులు, స్వాగతాలు, గుర్తుండిపోయే కన్నీటి వీడ్కోలు మధురంగా అనిపిస్తాయి. మనిషిని బ్రతికిస్తాయి. ప్రశాంతతను కలుగజేస్తాయి. ‘సండే గీత’ చిన్న మాటలతో గొప్ప విషయాన్ని బాగా చెప్పింది.
-ఎన్.ఆర్.లక్ష్మి (సికిందరాబాద్)

ప్రపంచ కుటుంబ దినోత్సవం సందర్భంగా చక్కని కవర్‌స్టోరీని అందించారు. కుటుంబ దినోత్సవ నేపథ్యాన్ని వివరించారు. భారతీయ కుటుంబ వ్యవస్థ ప్రపంచ దేశాలకు ఆదర్శం అంటూ ఒకప్పుడు ఉమ్మడి కుటుంబంలో ఎలా కలసిమెలసి ఉండేది, ఉమ్మడి కుటుంబ వ్యవస్థ వల్ల ప్రయోజనాలు, సమస్యలు, రాన్రాను చిన్న కుటుంబాలు ఏర్పడటంవల్ల తలెత్తుతున్న సమస్యలను క్లుప్తంగా అర్థవంతంగా వివరించినందుకు ధన్యవాదాలు.