మంగెన గంగాధరరావు, ఇరగవరం
నేతాజీ అదృశ్యం లేక మరణంపై ఇన్నాళ్లు పళ్లు నూరిన బి.జె.పి. కాంగ్రెస్ వారి తలని తన్నిందేమిటి? నేతాజీ తైపీలో 1945 విమాన ప్రమాదంలో మరణించారని నేటి బిజెపి వారి కేంద్ర ప్రభుత్వం నమ్ముతున్నానన్నది. అమెరికా - రష్యాలతో నూతన బాంధవ్యాలకై నిజాల్ని సమాధి చేశారా?
అంత లేదు. ప్రభుత్వ యంత్రాంగానికి బుర్ర ఉండదనటానికి ఇదో ఉదాహరణ.

డి. శంకర్, పెదపూడి
బాహుబలి-2 చిత్రాన్ని నిశితంగా విమర్శిస్తూ వ్యాసం ప్రచురించారు. వ్రాసినతని సంగతి ఎలావున్నా, ప్రచురించదలచుకున్నప్పుడు మీకు భయం కలగలేదా? ఇలాంటి విమర్శను ‘వారు’ సహృదయంతో స్వీకరిస్తారనే నమ్మకంతోనా?
విమర్శ చేసేది పాఠకుల కోసం...
ఒకరి మెప్పు కోసం కాదు.

వాండ్రంగి కొండలరావు, పొందూరు
తిరుమల తిరుపతి దేవస్థానం కార్యనిర్వహణాధికారిగా ఉత్తరాది ఐఎఎస్ అధికారిని నియమించడం సమంజసమేనా? తెలుగు వారికి అన్యాయం జరిగిందంటారా?
ఇప్పటిదాకా ఇ.ఓ.లుగా ఉన్న తెలుగువారు తెలుగుతనానికి ఊడబొడిచిందేమిటి? ఉత్తరాదివాళ్లు రావడం వల్ల కొత్తగా కొల్లబోయేదేమిటి?

అక్షతల మురళీధర శాస్ర్తి, అవుకు, కర్నూలు జిల్లా
ఏప్రిల్ 16వ తేదీ పజిల్‌లో నిలువు, అడ్డము గళ్ళు చాలా తికమక పెట్టేశాయ. ప్రతి అడ్డం గళ్ళు, ప్రతి నిలువు గళ్ళల్లో చాలా పొరపాట్లు ఉన్నాయ.
ఔను. పొరపాటైంది. ఆధారాలు కరెక్టే కాని, ఇచ్చిన గళ్ళబొమ్మ వేరొక పజిల్‌ది. ఆ సంగతి మరుసటి వారం జవాబుల గడులు చూశాక మీకు అర్థమయ్యే ఉంటుంది. ఇకముందు ఇలాంటి తప్పులు జరగకుండా జాగ్రత్త పడతాం.