మానకొండర్, జూలై 24: అగ్రవర్ణాల్లోని పేదలందరికి విద్య, వైద్య, ఉద్యోగ ఉపాధి రంగాల్లో జనాభా ప్రాతిపదికన రిజర్వేషన్లు, సంక్షేమ పథకాల్లో అవకశం కల్పించి సమన్యాయం జరపాలనిఅగ్రకుల సంక్షేమ సంఘాల సమాఖ్య రాష్ట్ర ఉపాధ్యక్షుడు పోలాడి రామారావు డిమాండ్ చేశారు. ప్రభుత్వం స్పందించకుంటే తెలంగాణ ఉద్యమ తరహలో నిరంతరం ఉద్యమిస్తామన్నారు. అదివారం మండల కేంద్రంలోని వేంకటేశ్వర దేవలయంలో ఓసి సంక్షేమ సమావేశం జరిగింది.

కరీంనగర్ టౌన్, జూలై 24: సోమవారం నిర్వహించే ‘డయల్ యువర్ కలెక్టర్’ కార్యక్రమాన్ని రద్దు చేసినట్లు కలెక్టర్ నీతూ ప్రసాద్ ఒక ప్రకటనలో తెలిపారు. ప్రజావాణి మాత్రం యదావిధిగా కొనసాగుతుందని, ఈ మార్పును ప్రజలు గమనించి సహకరించాలని కలెక్టర్ ఆ ప్రకటనలో కోరారు.

మహదేవపూర్, జూలై 24: మండలంలోని కాళేశ్వర పుణ్యక్షేత్రంలో ఆదివారం కరీంనగర్ జిల్లా ఓఎస్‌డి సుబ్బారాయుడు కుటుంబ సమేతంగా శని పూజలు నిర్వహించుకున్నారు. అనంతరం పుణ్య స్నానం ఆచరించి కాళేశ్వర ముక్తీశ్వర స్వామికి ప్రత్యేక అభిషేకం నిర్వహించారు. ఈవో హరిప్రకాష్ స్వామి వారి తీర్థ ప్రసాదాలతోపాటు మెమోంటోను అందజేశారు. ఆయన వెంట కాటారం సిఐ సదన్ కుమార్, మహదేవ్‌పూర్ ఎస్‌ఐ కృష్ణా రెడ్డి ఉన్నారు.

పరకాల, జూలై 24: పరకాల ప్రభుత్వ ఆసుపత్రిలో పసికందు మృతికి కారణమైన డాక్టర్లను, నర్సులను తక్షణమే సస్పెండ్ చేయాలని టిడిపి నేతలు డిమాండ్ చేశారు. ఆదివారం టిడిపి జిల్లా ఉపాధ్యక్షులు చిట్టిరెడ్డి లక్ష్మారెడ్డి, జిల్లా కార్యదర్శి గందం సమ్మయ్య, మండల పార్టీ అధ్యక్షులు చాడ రవీందర్‌రెడ్డి ఆధ్వర్యంలో పరకాల ప్రభుత్వ ఆసుపత్రిని సందర్శించారు.