హైదరాబాద్: తెలంగాణ మున్సిపల్ మంత్రి కెటిఆర్ జన్మదినం సందర్భంగా కొంపల్లిలో హరితహారం కార్యక్రమాన్ని నిర్వహించారు. మంత్రి కెటిఆర్ మొక్కను నాటగా, తెరాస నేతలు కేక్ కట్ చేశారు. కెటిఆర్ జన్మదినం సందర్భంగా లక్ష మొక్కలు నాటేందుకు ఏర్పాట్లు చేశామని ఎమ్మెల్సీ శంభీపూర్ రాజు తెలిపారు. పలు పాఠశాలలకు చెందిన విద్యార్థులు మొక్కలు నాటారు.

దిల్లీ: ఓ మహిళను బెదిరించినట్లు వచ్చిన అభియోగంపై దిల్లీలో ఆదివారం ఉదయం ఆమ్ ఆద్మీ పార్టీ ఎమ్మెల్యే అమానుల్లా ఖాన్‌ను పోలీసులు అరెస్టు చేశారు. ఇటీవలి కాలంలో పలు కేసుల్లో ఆప్ ఎమ్మెల్యేలు వరుసగా అరెస్టు కావడం గమనార్హం. తమ పార్టీకి చెందిన మరో ఎమ్మెల్యేను ప్రధాని మోదీజీ అరెస్టు చేయించారని ఆప్ అధినేత, దిల్లీ సిఎం కేజ్రీవాల్ ట్వీట్ చేశారు.

హైదరాబాద్: మెడికల్ కోర్సుల్లో ప్రవేశాలకు జాతీయ స్థాయిలో నిర్వహించే నీట్-2 ప్రవేశపరీక్ష ఆదివారం ఉదయం ప్రారంభమైంది. రెండు తెలుగు రాష్ట్రాల్లో హైదరాబాద్, విజయవాడ, విశాఖ కేంద్రాల్లో ఈ పరీక్షను నిర్వహిస్తున్నారు. ఉదయం 10 నుంచి మధ్యాహ్నం ఒంటిగంట వరకూ జరిగే పరీక్ష కోసం అధికారులు అన్ని ఏర్పాట్లు చేశారు. హైదరాబాద్‌లో 23వేల మంది, విజయవాడ,విశాఖల్లో 20 వేల మంది అభ్యర్థులు నీట్-2కు దరఖాస్తు చేశారు.

విశాఖ : విమానంలో గల్లంతైన ఎన్ఏడీ ఉద్యోగుల కుటుంబాలను తూర్పు నావికాదళ వైస్‌ అడ్మిరల్‌ బిస్త్‌ ఆదివారం పరామర్శించారు. గల్లంతైన విమానంలో విశాఖపట్టణానికి చెందిన 8 మంది ఎన్ఏడీ ఉద్యోగులు ఉన్నారు. ప్రస్తుతం వారి కుటుంబ సభ్యులు మొత్తం ఆందోళనలో ఉన్నారు.