రెండో స్థానంలో హిందూజా సోదరులు

లండన్, మే 13: బ్రిటన్‌లోని ఐశ్వర్యవంతుల జాబితాలో మొదటి స్థానంలో ఉన్న భారత సంతతికి చెందిన హిందూజ సోదరులు రెండవ స్ధానానికి దిగజారారు. ఆ దేశానికి చెందిన రసాయనిక పరిశ్రమల పారిశ్రామికవేత్త జిమ్ రాట్‌క్లిఫ్ మొదటి స్థానంలో నిలిచారు. బ్రిటన్ ఐశ్వర్యవంతుల జాబితాను సండే టైమ్స్ రిచ్ లిస్ట్ ప్రకటించింది. బ్రిటన్ సంపన్నులో అగ్రస్థానంలో నిలిచిన జిమ్ రాట్‌క్లిఫ్ ఆదాయం 21.05 బిలియన్ పౌండ్లు, హిందూజా సోదరుల సాలీనా ఆదాయం 20.65 బిలియన్ పౌండ్లు. 2018 జాబితాలో బ్రిటన్‌కు చెందిన వెయ్యి సంపన్న కుటుంబాల జాబితాను ప్రచురించారు. ఇందులో భారత సంతతికి చెందిన 47 కుటుంబాలు ఉన్నాయి. బ్రిటన్‌లో ఇటీవల కాలంలో స్వావలంభన, స్వయంకృషితో పారిశ్రామిక రంగంలో అడుగుపెట్టి సంపన్నులైనవారు పెరుగుతున్నారని సర్వే నిర్వహించిన రామర్ట్ వాట్స్ పేర్కొన్నారు. అత్యంత ఐశ్వర్యవంతులుగా అవతరించిన వారిలో చాలా మంది చాక్లెట్, ఆహార పదార్ధాలు, గుడ్ల పరిశ్రమలో ఉన్నత శిఖరాలను అధిరోహించారు. వీరిలో చాలా మంది చిన్న వయస్సులో పాఠశాల వెళ్లేందుకు కూడా అనేక కష్టాలను ఎదుర్కొన్నారు. చాలా మంది ఐశ్వర్యవంతులు పేదరికంతో జీవితాన్ని ప్రారంభించారు. ప్రసుత్తం ఐశ్వర్యంతుల జాబితాలో అగ్రస్థానంలో ఉన్న రాట్‌క్లిఫ్ 2017లో 15.3బిలియన్ పౌండ్ల ఆదాయంతో 18వ స్థానంలో ఉన్నారు. ఐశ్వర్యవంతుల జాబితాలో లండన్‌కు చెందిన గోపి (78), శ్రీ (82)వ్యాపార సామ్రాజ్యాలను నెలకొల్పారు. గత ఏడాదిలో హిందూజా బ్రదర్స్ ఆదాయం 4.44 బిలియన్లు పెరిగినా, రెండవ స్థానానికి వచ్చారు. ప్రస్తుతం బ్రిటన్ పారిశ్రామికవేత్తలు చమురు, సహజవాయువు, ఐటి, ఇంధనం, మీడియా, బ్యాంకింగ్, రియాల్టీ, వైద్య రంగంలో పెట్టుబడులను విస్తరించారు. ఇండియన్ ఆటోమోటివ్ మ్యానుఫ్యాక్చరర్ అశోక్ లీ ల్యాండ్, ముంబాయికి చెందిన ఇండస్ ఇండ్ బ్యాంక్ సంస్థలకు చెందిన షేర్ల సూచి కూడా గణనీయంగా పెరిగింది. బ్రిటన్ అమెరికన్ పారిశ్రామికవేత్త సర్ లెన్ బ్లావత్నిక్ 15.26 బిలియన్ పౌండ్లతో ఐశ్వర్యవంతుల జాబితాలో మూడవ స్థానాన్ని దక్కించుకున్నారు. మరో ఎన్‌ఆర్‌ఐ లార్డ్ స్వరాజ్‌పాల్ ఈ జాబితాలో 90వ స్థానాన్ని సంపాదించారు.