మేలో జోరుగా కార్ల అమ్మకాలు

న్యూఢిల్లీ, జూన్ 2: దేశంలో ఈ ఆర్థిక సంవత్సరంలో కార్ల మార్కెట్లో వరుసగా రెండో నెల మేలో కూడా రెండు అంకెల వృద్ధిరేటుతో అమ్మకాలను నమోదు చేశాయి. మారుతి సుజుకి ఇండియా, టాటామోటార్స్, హోండా కార్ల అమ్మకాల్లో వృద్ధిరేటు నమోదైంది. ఫోర్డ్ ఇండియా కూడా రెండు అంకెల వృద్ధిరేటు నమోదు చేయగా, హోండాయ్ మోటార్ ఇండియా, మహీంద్రా మహీంద్రా దేశీయ మార్కెట్లో సింగిల్ డిజిట్ వృద్ధిరేటును నమోదు చేశాయి. గత ఏడాది మే నెలలో మారుతి సుజుకి 130,675 యూనిట్లను విక్రయించగా, ఈ ఏడాది మే నెలలో 163,200 యూనిట్లను విక్రయించాయి. విక్రయాల్లో 24.9 శాతం మేర వృద్ధిరేటును నమోదు చేశాయి. స్విఫ్ట్, ఎస్టిలో, డిజైర్, బాలెనో కార్ల విక్రయం పెరిగింది. 51,234 యూనిట్ల నుంచి 77263 యూనిట్లకు కార్ల విక్రయం పెరిగింది. యుటిలిటీ వాహనాల అమ్మకాల్లో 13.4 శాతం మేర వృద్ధిరేటు నమోదైంది. మినీ సెగ్మెంట్ విభాగంలో ఆల్టా, వాగన్ ఆర్ కార్ల విక్రయం 3.1 శాతం మేర తగ్గింది. టాటా మోటార్స్ విక్రయాలు 61 శాతం పెరిగాయి. గత ఏడాది మే నెలలో ఈ సంస్ధ కార్ల విక్రయం 10,855 ఉండగా, ఈ ఏడాది మే నెలలో 17,489 కార్లను విక్రయించినట్లు టాటా మోటార్స్ సంస్థ పేర్కొంది. హోండా కార్ల విక్రయాలు 41 శాతం వృద్ధిరేటును నమోదు చేశాయి. గత ఏడాది మే నెలలో 11,278 యూనిట్లను, ఈ ఏడాది 15,864 కార్లను విక్రయించినట్లు ఆ సంస్థ సీనియర్ వైస్ ప్రెసిడెంట్ రాజేష్ గోయల్ చెప్పారు. మే నెలలో ఈ సంస్ధ కొత్త బ్రాండ్ అమేజ్ 9789 యూనిట్లను విక్రయించినట్లు ఆయన చెప్పారు. కార్ల అమ్మకాలు ఆశాజనకంగా ఉంటుందని ఫోర్డ్ ఇండియ అధ్యక్షుడు ఎండి అనురాగ్ మెహ్రోతా తెలిపారు. కాని ఇంధన ధరలు పెరగడం వల్ల ద్రవ్యోల్బణం పెరిగి ప్రతికూల ప్రభావం పడే అవకాశాలు లేకపోలేదని ఆయన చెప్పారు.
కాగా ద్విచక్రవాహనాల సెగ్మెంట్‌లో హీరో మోటార్ 11 శాతం వృద్ధిరేటును, బజాజ్ ఆటో 30 శాతం, టీవీఎస్ కంపెనీ 10 శాతంమేర విక్రయాల్లో వృద్ధిరేటును నమోదు చేశాయి.