ఐఎల్ అండ్ ఎఫ్‌ఎస్ ఆస్తులు అమ్మకానికి..

న్యూఢిల్లీ, డిసెంబర్ 31: అప్పుల్లో కూరుకుపోయిన ది ఇన్ఫ్రాస్ట్రక్చర్ లీజింగ్ అండ్ ఫైనాన్షియల్ సర్వీసెస్ (ఐఎల్ అండ్ ఎఫ్‌ఎస్) గ్రూప్ సంస్థ ఆస్తుల అమ్మకం ద్వారా నిధులు సమీకరించుకోవాలని నిర్ణయించింది. తద్వారా రుణాలను తీర్చాలని తీర్మానించింది. ఈ క్రమంలో ఈ సంస్థ ముంబయి, కేరళలో గల వాణిజ్య, నివాస ఆస్తుల విక్రయానికి టెండర్లు ఆహ్వానించింది. ముంబయిలోని మలబార్ హిల్స్ ప్రాంతంలో 1,376 చదరపు అడుగుల విస్తీర్ణం ఉన్న మూడు వాణిజ్య స్థలాలను, అలాగే కోల్‌కతాలోని మరో వాణిజ్య పరమైన స్థలాన్ని ఈ సంస్థ విక్రయానికి పెట్టింది. జనవరి 15లోపు ఇందుకు సంబంధించిన బిడ్లు సమర్పించాల్సివుంది. ఇలావుండగా ఐఎల్ అండ్ ఎఫ్‌ఎస్ సంస్థ మొత్తం 91 వేల కోట్ల రూపాయల మేర బ్యాంకుల నుంచి రుణాలుగా పొందడం జరిగింది. ఈ అప్పులు మరోవిధంగా మార్పుచేసేందుకు సైతం వీలులేనివిగా మారడంతో ఇక తప్పని సరిగా తీర్చేందుకు ఆస్తుల అమ్మకమే శరణ్యమని యాజమాన్యం నిర్ణయించింది. ఇదివరకే ఈ సంస్థ అనేక రోడ్డు, సౌరశక్తి విభాగాలు, విద్యా సంస్థల ఆస్తులను విక్రయానికి పెట్టింది. అలాగే లగ్జరీ కార్లు, కార్యాలయ ఫర్నిచర్ తదితరాలను సైతం అమ్మకానికి పెట్టింది. కాగా తాజాగా ఈ కంపెనీ అమ్మజూపిన ఆస్తుల ద్వారా రూ.200 కోట్లు సమీకరించేందుకు వీలుందని విశ్వసనీయ వర్గాల సమాచారం.