విద్యుత్ స్తంబాన్ని ఢీకొన్న ఆర్టీసీ బస్సు

పెద్దవడుగూరు, డిసెంబర్ 26 : మండల పరిధిలోని దిమ్మగుడి గ్రామం వద్ద బుధవారం నెల్లూరు డిపోకు చెందిన ఆర్టీసీ బస్సు విద్యుత్ స్తంబాన్ని ఢీకొంది. పోలీసులు తెలిపిన వివరాల మేరకు జిల్లాకేంద్రంలో జరుగుతున్న ధర్మపోరాట దీక్షకు చిత్తూరు గ్రామస్థులను తరలిస్తున్న ఆర్టీసీ బస్సు దిమ్మగుడి గ్రామం వద్ద మలుపులో విద్యుత్ స్తంబాన్ని ఢీకొంది. ఈ ప్రమాదంలో చిత్తూరు గ్రామానికి చెందిన నారాయణ, బాలరాజు, భూచెమ్మ, లక్ష్మీదేవితోపాటు మరొకరికి గాయాలయ్యాయి. వీరిని వెంటనే పెద్దవడుగూరు ప్రైవేట్ వైద్యశాలకు తరలించారు. అక్కడి నుంచి మెరుగైన చికిత్స కోసం పామిడికి తీసుకెళ్లారు. స్థానికుల వివరాల మేరకు కేసు దర్యాప్తు చేస్తున్నట్లు పోలీసులు తెలిపారు.