వ్యక్తి అనుమానాస్పద మృతి

మడకశిర, డిసెంబర్ 26 : పట్టణంలోని అంబేద్కర్ సర్కిల్‌లో శ్రీనివాసులు (38) బుధవారం అనుమానాస్పద స్థితిలో మృతి చెందాడు. అనంతపురం పట్టణంలోని వినాయక్‌నగర్‌లో నివాసం ఉంటున్న శ్రీనివాసులు రెండు రోజుల క్రితం బేల్దార్ పని నిమిత్తం మడకశిరకు వచ్చినట్లు ఎస్సై గోపీ తెలిపారు. అయితే బుధవారం తెల్లవారుఝామున రహదారి దాటేందుకు ప్రయత్నించగా గుర్తు తెలియని వాహనం ఢీకొని మృతి చెంది ఉండవచ్చని అభిప్రాయ పడుతున్నారు. అయితే మృతుడు మద్యం మత్తులో ఉండటంతో ప్రమాదం జరిగి ఉంటుందన్నారు. ఆ సమయంలో అటుగా వచ్చిన బీట్ కానిస్టేబుళ్లు గమనించి వెంటనే ప్రభుత్వాసుపత్రికి తరలించారు. అప్పటికే శ్రీనివాసులు మృతి చెందినట్లు వైద్యులు ధృవీకరించారు. అతని వద్ద సెల్‌ఫోన్ ఆధారంగా కుటుంబ సభ్యులకు సమాచారం అందించారు. పోస్టుమార్టం అనంతరం మృతదేహాన్ని బంధువులకు అప్పగించారు. ఈ మేరకు కేసు దర్యాప్తు చేస్తున్నట్లు ఎస్సై తెలిపారు.