ఇసుక లారీ ఢీకొని రైతు దుర్మరణం

ఎల్లారెడ్డిపేట, మార్చి 23: ఎల్లారెడ్డిపేట మండలం వెంకటాపూర్ బస్టాండు ప్రాంతంలో కామారెడ్డి, కరీంనగర్ ప్రధాన రహదారిపై ద్విచక్రవాహనాన్ని శుక్రవారం ఇసుక లారీ ఢీకొంది. ఈ సంఘటనలో పదిర గ్రామానికి చెందిన రైతు గోపన్నగారి లస్మయ్య(54) దుర్మరణం పాలయ్యాడు. అతని భార్య రేణుక తీవ్ర గాయాలకు గురైంది. ఆమె పరిస్థితి విషమంగా మారడంతో కరీంనగర్‌కు తీసుకెళ్లారు. పోలీసులు, గ్రామస్థుల కథనం మేరకు లస్మయ్య వ్యవసాయం చేసుకుంటూ జీవిస్తుండేవాడు. తన భార్య రేణుక, కుమారుడు మహేందర్‌తో కలిసి ద్విచక్రవాహనంపై సిరిసిల్లకు వెళుతున్నారు. అటు నుంచి కామారెడ్డి వైపుకు వస్తున్న ఇసుక లారీ అతి వేగంగా ద్విచక్రవాహనాన్ని ఢీకొట్టింది. లస్మయ్య, రేణలకు తీవ్ర గాయాలయ్యాయి. మహేందర్ స్వల్ప గాయాలతో బయట పడ్డాడు. మొదట సిరిసిల్లకు తరలించారు. ఆసుపత్రిలో చికిత్స అందించే క్రమంలో లస్మయ్య చనిపోయాడు. రేణుక పరిస్థితి విషమంగా మారడంతో కరీంనగర్‌కు తీసుకెళ్లారు. విషయం తెలియడంతో గ్రామస్థులు, కుటుంబీకులు భారీ సంఖ్యలో సిరిసిల్లకు తరలివెళ్లారు. బంధువులు, కుటుంబీకుల రోధనలు మిన్నంటాయి. మృతుడికి ముగ్గురు కుమారులు మహేందర్, శేఖర్, ప్రభాకర్‌లు ఉన్నారు. కేసు దర్యాప్తు చేస్తున్నామని పోలీసులు తెలిపారు.