భారత మార్కెట్లను శాసించనున్న అమెరికన్ ఫెడ్ రేట్ల ప్రభావం!

న్యూఢిల్లీ : దిగ్గజ కంపెనీల త్రైమాసిక ఫలితాలు, అమెరికన్ ఫెడరేషన్ పన్ను రేట్ల కోత నిర్ణయం వంటి అంశాలు ఈ వారం దేశీయ స్టాక్ మార్కెట్లను ప్రభావితం చేస్తాయని వాణిజ్య రంగ నిపుణులు అంచనావేస్తున్నారు. గత వాణిజ్య వారం చివరి రోజైన శుక్రవారం నాడు ఎట్టకేలకు ఆరు రోజుల నష్టాలను అధిగమించిన సూచీలు స్వల్ప లాభాలను నమోదు చేసిన సంగతి తెలిసిందే. కాగా కంపెనీల బలహీన త్రైమాసిక ఫలితాలు, విదేశీ పెట్టుబడులు వెనక్కు మళ్లడం, గడచిన వారం మొత్తానికి అంతర్జాతీయ మార్కెట్ల స్థితిగతులు ఈ వారం సైతం మదుపర్ల సెంటిమెంటును ప్రభావితం చేస్తాయని విశే్లషకులు అంచనా వేస్తున్నారు. గత వారం దేశీయ మార్కెట్ల నష్టాల పరంపర, రుతపవనాల ప్రభావం ఇప్పటికీ మెజారిటీ శాతం ప్రాంతాల్లో ఆశించిన మేర లేకపోవడం మదుపర్లు ఆచితూచి అడుగేసేలా చేయవచ్చని ప్రముఖ విశే్లషకుడు రమేష్ తివారీ పేర్కొన్నారు. ప్రస్తుతానికి అందరి కళ్లూ అమెరికన్ ఫెడరేషన్ వడ్డీ రేట్ల నిర్ణయంపైనే కేంద్రీకృతమై ఉన్నాయని, మనదేశంపైకి విదేశీ మదుపర్ల దృష్టి మళ్లాల్సిన అవసరం ఏంతైనా ఉందని మరో విశే్లషకుడు వినోద్ నాయర్ తెలిపారు.