సక్సెస్‌తో కొత్త ఊపిరి

చిన్న తారలతో సినిమా తీసి విజయం సాధించడం ఆక్సిజన్ లాంటిదని ‘రోజులు మారాయి’ చిత్ర యూనిట్ అభిప్రాయం వెలిబుచ్చింది. మురళీకృష్ణ ముడిదాని దర్శకత్వంలో జి.శ్రీనివాసరావు రూపొందించిన ‘రోజులు మారాయి’ ఇటీవల విడుదలైన సంగతి తెలిసిందే. ఈ చిత్రానికి సంబంధించిన విజయోత్సవ వేడుక హైదరాబాద్‌లో నిర్వహించారు. ఈ సందర్భంగా దర్శకుడు మారుతి మాట్లాడుతూ, తాను ‘బాబు బంగారం’ సినిమా షూటింగ్ బిజీలో వున్నపుడే నిర్మాత రాజు ఈ సినిమాపై పూర్తి కేర్ తీసుకున్నారని, అంతా ఆయనే దగ్గరుండి ఎడిటింగ్ చేయించారని, ఇంత విజయాన్ని అందించిన రెండు రాష్ట్రాల ప్రజలకు కృతజ్ఞతలని తెలిపారు. చిన్న సినిమాగా విడుదలై ఈ చిత్రం మంచి గ్రాస్ రాబట్టిందని, ఇది తమకు ఆక్సిజన్‌లా ఉపయోగపడిందని ఆయన తెలిపారు. సినిమా దర్శకుడు కావాలనే లక్ష్యంతో ఈ సినిమాకు పనిచేశానని, అవకాశమిచ్చిన వారందరికీ రుణపడి వుంటానని, ఈ యూనిట్‌లో ప్రతి ఒక్కరూ సినిమా బాగా రావాలని కష్టపడ్డారని దర్శకుడు మురళీకృష్ణ అన్నారు. కార్యక్రమంలో చిత్ర యూనిట్‌కు విజయోత్సవ జ్ఞాపికలతో అభినందించారు.