శ్రీవల్ల్లీ వస్తోంది

బాహుబలి, భజరంగీ భాయ్‌జాన్ వంటి భారీ సినిమాలకు కథలు అందించి దేశవ్యాప్తంగా గుర్తింపు పొందిన రచయిత విజయేంద్రప్రసాద్. ఆయన స్వీయ దర్శకత్వంలో తెరకెక్కిన చిత్రం ‘శ్రీవల్లీ’. సైంటిఫిక్ థ్రిల్లర్‌గా రూపొందించిన చిత్రం జూన్ మొదటివారంలో విడుదల కానుంది. ఈ సందర్భంగా హైదరాబాద్‌లో ఏర్పాటు చేసిన మీడియా సమావేశంలో దర్శకుడు విజయేంద్రప్రసాద్ మాట్లాడుతూ ‘నిజానికి ఈ చిత్రం ఎప్పుడో విడుదల కావాల్సి ఉంది. ఆలస్యంగా విడుదల చేయడానికి కొన్ని కారణాలున్నాయి. సినిమాకు పనిచేసిన వాళ్లంతా కొత్తవాళ్లే. ప్రేక్షకులకు తెలిసినవాడిని నేనొక్కడినే. బాహుబలి-1తో కొంత పేరొచ్చినా, రెండో పార్ట్ విడుదలయ్యాక వచ్చే పేరు ‘శ్రీవల్లి’ చిత్రానికి ఉపకరిస్తుందనే ఆలస్యం చేశాం. అలాగే కొత్త నటీనటులైతే ఎలాంటి ఇమేజ్ ఉండదు కనుక కథకు హెల్ప్ అయ్యే విధంగా వాడుకోవచ్చని వాళ్లను తీసుకున్నాం. ఈ సినిమా అంతా మనసులోని చెడు భావాలను తొలగించడం అనే ప్రయోగం నేపథ్యంలో సాగుతుంది. మనసుని చూడటం, కొలవటం అనే ప్రయోగం. ఈ ప్రయోగంలో పాల్గొన్న అమ్మాయికి తన గత జన్మల జ్ఞాపకాలు కూడా గుర్తొస్తాయి. ఆ జన్మకు, ప్రస్తుత జన్మకు మధ్య జరిగే ఘర్షణ ఎలా ఉంటుందనేది చూపిస్తాం’ అని వెల్లడించారు. ఈ చిత్రంలో రజత్, నేహాసింగ్ హీరో హీరోయిన్లుగా నటిస్తున్నారు. సమావేశంలో నిర్మాతలు సునీత, రాజకుమార్, చిత్ర హీరో రజత్‌లు పాల్గొన్నారు.