చేరువైన మనం సైతం..

నటుడు కాదంబరి కిరణ్ ఆధ్వర్యంలో నిర్వహిస్తున్న ‘మనం సైతం..’ సంస్థ సహాయ కార్యక్రమాలు మరింత విస్తృతం కానున్నాయి. సినిమాటోగ్రఫీ శాఖా మంత్రి తలసాని శ్రీనివాస్ యాదవ్ పుట్టినరోజు సందర్భంగా హైదరాబాద్ ఫిలిం ఛాంబర్‌లో జరిగిన ఈ కార్యక్రమంలో ఇద్దరు ఆపన్నులకు సహాయాన్ని అందించింది. ఈ కార్యక్రమంలో హీరో శ్రీకాంత్ నిర్మాత సి.కల్యాణ్, చాంబర్ అధ్యక్షుడు పి.కిరణ్, నటి సన, అమ్మిరాజు, బందరు బాబ్జి తదితరులు పాల్గొన్నారు. ఈ సందర్భంగా అనారోగ్యం పాలై ఆర్థిక ఇబ్బందుల్లో వున్న కాస్ట్యూమర్ ఏడుకొండలు, ప్రొడక్షన్ మేనేజర్ రమేష్‌బాబు తనయుడు కేశవ్ మణిశంకర్ చదువుకు ఆర్థిక సాయం అందజేశారు. అనంతరం కాదంబరి కిరణ్ మాట్లాడుతూ- సహాయం కోసం ఎదురుచూసేవాళ్లు మన చుట్టూనే ఉన్నారు. అలాంటివాళ్లకోసం ఒక్క క్షణం ఆలోచిస్తే వాళ్ల అవసరాన్ని తీర్చగలుగుతాం. కష్టాల్లో వున్న కొంతమందికైనా సాయపడాలనే ఉద్దేశ్యంతో ఈ సంస్థను ఏర్పాటుచేశాం. మాకు సహకరిస్తున్న అందరికీ కృతజ్ఞతలు అన్నారు. సి.కల్యాణ్ మాట్లాడుతూ- కిరణ్‌ను చూస్తుంటే ఆయనకంటే మంచి స్థాయిలో వున్న మేము ఎందుకిలాంటి కార్యక్రమాలు చేయడంలేదనే ఆలోచన వస్తుంది. అయినా మనం సైతం కార్యక్రమంలో భాగస్వాములమవుతాం అన్నారు. శ్రీకాంత్ మాట్లాడుతూ- ఎప్పుడూ సాటివాళ్ల గురించి ఆలోచించే కాదంబరి కిరణ్ ఇలాంటి సహాయ కార్యక్రమాలు చేయడం ఆనందంగా ఉంది అన్నారు. ఈ కార్యక్రమంలో కేక్ కట్ చేశారు.