‘ప్రేమదేశం’ లోగో

శ్రీమారుతీ ఆర్ట్ క్రియేషన్స్, సిరి క్రియేషన్స్ పతాకంపై సంయుక్తంగా రూపొందించిన చిత్రం ‘ప్రేమదేశం’. శ్రీకాంత్ సిద్ధం దర్శకత్వంలో స్రవంతి శ్రీ్ధర్ రూపొందిస్తున్నారు. అర్జున్ కళ్యాణ్, మోహన్, శివరామచంద్రన్, అక్షయ, రవళి, వైశాకి తదితరులు నటిస్తున్న ఈ చిత్రానికి సంబంధించిన రెగ్యులర్ షూటింగ్ డిసెంబర్ నుండి ప్రారంభం కానున్నది. వేసవి విడుదల చేయడానికి సన్నాహాలు చేస్తున్నారు. సినిమాకు సంబంధించి లోగోను హైదరాబాద్‌లో దర్శకుడు బాబి విడుదల చేశారు. ఈ సందర్భంగా ఆయన మాట్లాడుతూ ‘ప్రేమదేశం’ అనగానే టీనేజ్ రోజులు గుర్తుకు వచ్చాయని టీజర్ చాలా బాగా ఉందని, అంతా కొత్తవాళ్లే అయినా బాగా నటించారని, పెద్ద విజయం సాధించాలని కోరుకున్నారు. చిన్న సినిమాల్లో పెద్ద సినిమాగా రూపొందిన ఈ చిత్రంలో నటీనటులందరూ బాగా నటించారని, ‘పెళ్ళిచూపులు’ సినిమా తర్వాత అంతగా బాగా ప్రేక్షకులకు నచ్చుతుందని నిర్మాత తెలిపారు. హైపర్ లింక్డ్ స్క్రీన్‌ప్లేతో తెరకెక్కనున్న ఈ సినిమాలో మూడు కథలు ప్రేక్షకులకు నచ్చుతాయని, హైదరాబాద్ నేపథ్యంలో జరిగిన ఓ ప్రమాదం సంఘటన ఆధారంగా ఈ చిత్రం రూపొందిస్తున్నామని, మిగతా వివరాలు త్వరలో తెలుపుతామని దర్శకుడు శ్రీకాంత్ సిద్ధం అన్నారు.