‘రాజరథం’ ట్రైలర్ వచ్చేసింది!

నిరూప్ భండారి, అవంతిక శెట్టి జంటగా అనూప్ భండారి దర్శకత్వంలో జాలీ హిట్స్ ప్రొడక్షన్స్ పతాకంపై రూపొందించిన చిత్రం ‘రాజరథం’. షూటింగ్ పూర్తిచేసుకుని ప్రస్తుతం పోస్ట్ ప్రొడక్షన్ కార్యక్రమాలు జరుపుతున్నారు. జనవరి 25న విడుదల కానున్న ఈ చిత్రానికి సంబంధించిన ట్రైలర్‌ను హైదరాబాద్ ప్రసాద్ లాబ్‌లో దగ్గుబాటి రాణా ఆవిష్కరించారు. ఈ సందర్భంగా హీరో నిరూప్ భండారి మాట్లాడుతూ- సినిమా అందరికీ నచ్చే విధంగా రూపొందిందని, దర్శకత్వం, సంగీతం అన్నయ్య చేస్తే, వదిన కాస్ట్యూమ్స్ డిజైన్ చేశారని, ఈ చిత్రం ద్వారా తెలుగులోకి ఎంట్రీ ఇస్తున్నందుకు ఆనందంగా వుందని తెలిపారు. హైటెక్నికల్ విలువలతో భారీ బడ్జెట్‌తో ఈ చిత్రాన్ని రూపొందించామని దర్శకుడు అనూప్ భండారి తెలిపారు. అనూప్ భండారి రూపొందించిన ‘రంగి తరంగ’ కన్నడ చిత్రం అనేక అవార్డులను గెలుచుకుందని, ఈ సినిమాలో తాను కనిపించకుండా వినిపిస్తానని నటుడు రానా తెలిపారు. హద్దులను చెరిపేసే కథలలో రాజరథం ఒకటని, విలక్షణమైన కథతో రూపొందిన ఈ సినిమా తప్పక విజయవంతం కావాలని ఆయన కోరుకున్నారు. కార్యక్రమంలో సతీష్ శాస్ర్తీ, అవంతిక శెట్టి, రామజోగయ్య శాస్ర్తీ, అబ్బూరి రవి తదితరులు పాల్గొని విశేషాలు తెలిపారు.