నీది నాది ఒకే కథ

శ్రీవిష్ణు, సాత్నాటైటస్ జంటగా వేణు ఉడుగుల దర్శకత్వంలో అరాన్ మీడియా వర్క్స్ పతాకంపై ప్రశాంతి, కృష్ణవిజయ్ నిర్మించిన ‘నీది నాది ఒకే కథ’ చిత్రం శుక్రవారం విడుదలవుతున్న సందర్భంగా హైదరాబాద్‌లో ప్రీ రిలీజ్ ఈవెంట్‌ను నిర్వహించారు. ఈ కార్యక్రమంలో నిర్మాత రాజ్ కందుకూరి మాట్లాడుతూ- ఈమధ్య కొత్త దర్శకుల ప్రభంజనం మొదలైంది. అదే కోవలో వేణు కూడా ఉంటాడని ఖచ్చితంగా చెబుతున్నాను. ట్రైలర్ బాగుంది. తప్పకుండా మంచి విజయం సాధిస్తుంది అన్నారు. దర్శకుడు నాగేశ్వర్‌రెడ్డి మాట్లాడుతూ- నారా రోహిత్ హీరోగానే కాకుండా నిర్మాతగా కూడా కొత్త దర్శకులను పరిచయం చేస్తున్నాడు. ఇండస్ట్రీకి నిర్మాతే ప్రాణం అని నమ్మే వ్యక్తిని నేను. ఆకలిరాజ్యం సినిమాలో తండ్రీకొడుకుల సీన్ మళ్లీ గుర్తుకొచ్చింది. ఈ సినిమా కూడా అందరికీ గుర్తుండిపోతుంది అన్నారు. హీరో శ్రీవిష్ణు మాట్లాడుతూ- దర్శకుడు కథ చెప్పినపుడు ఇదేదో నా కథలాగే ఉందనిపించింది. ఎందుకంటే, ఇలాంటి కథలు మన జీవితాలకు దగ్గరగా ఉంటాయి. దర్శకుడు అద్భుతంగా తెరకెక్కించాడు. ఈ సినిమా చూసినవాళ్ళందరూ భలేగా ఉందని అంటున్నారు. చాలామంది సొసైటీకోసం బతుకుతున్నారు. అలా కాకుండా వారికోసం వారు బ్రతికినపుడే జీవితం మరోలా వుంటుంది. ముఖ్యంగా పిల్లలపై తల్లిదండ్రులు నమ్మకం పెట్టుకోవాలి. అలా కాకపోతే ఇంకెవరూ నమ్మరు అని చెప్పే సినిమా ఇది అన్నారు.