సమ్మోహనపరిచారు!

సుధీర్‌బాబు, అదితిరావు హైదరి జంటగా మోహనకృష్ణ ఇంద్రగంటి దర్శకత్వంలో శ్రీదేవి మూవీస్ పతాకంపై కృష్ణ ప్రసాద్ నిర్మించిన ‘సమ్మోహనం’ చిత్రం ఇటీవలే విడుదలై మంచి విజయాన్ని అందుకున్న సందర్భంగా చిత్ర యూనిట్ విజయోత్సవ సభని హైదరాబాద్‌లో నిర్వహించారు. ఈ కార్యక్రమంలో సుధీర్‌బాబు మాట్లాడుతూ- ఈ సినిమా నన్ను సామాన్య ప్రేక్షకులకు దగ్గర చేసింది. ప్రేమకథా చిత్రం తరువాత చాలా చిత్రాలు చేశాను. కానీ నన్ను అందరూ ఆ చిత్రంతోనే పిలిచేవారు. చాలా రోజులకు సమ్మోహనం హిట్‌తో వాటన్నింటినీ తుడిచేసింది. ఈ సినిమా మహేష్‌కు కూడా బాగా నచ్చింది. ఆయనతోపాటు చాలామంది హీరోలు సపోర్టు చేశారు. ఓవర్సీస్‌లో కూడా మంచి వసూళ్లను రాబడుతోంది. ఇంత మంచి సినిమా ఇచ్చిన మోహన కృష్ణకు థాంక్స్. దర్శకుడు మోహనకృష్ణ మాట్లాడుతూ- ఈ కథపై మేం పెట్టుకున్న నమ్మకం నిజం అయింది. కథను విన్పించినప్పటినుంచీ నిర్మాత కృష్ణప్రసాద్ సపోర్టు చేస్తూనే ఉన్నారు. అలాగే ఈ కథను ఒప్పుకున్న సుధీర్‌బాబు ఛాలెంజింగ్‌గా సినిమా చేశాడు. అలాగే పి.జి.విందా అద్భుతమైన కెమెరా పనితనం చూపించాడు. ఈ సినిమాతో పనిచేసిన ప్రతి ఒక్కరూ అందించిన సపోర్టుతోనే ఇంత మంచి విజయాన్ని అందుకున్నాం అన్నారు. నిర్మాత మాట్లాడుతూ- మోహనకృష్ణ మరోసారి మా బ్యానర్‌కు మంచి విజయాన్ని ఇచ్చారు. ఓ మంచి సినిమాను నిర్మించాలన్న సంతృప్తి వుంది. ఇంత సపోర్టు చేసిన ప్రేక్షకులకు కృతజ్ఞతలు అన్నారు. తరుణ్ భాస్కర్ మాట్లాడుతూ- వివేక్ సాగర్ అందించిన పాటలు మంచి విజయం సాధించాయి. మంచి సినిమా ఇది. అందరికీ అభినందనలు తెలుపుతున్నాను అన్నారు.