31న రానున్న పేపర్ బాయ్

సంపత్ నంది టీమ్ వర్క్స్, ప్రచిత్ర క్రియేషన్స్, బి.ఎల్.ఎన్. సినిమా పతాకాలపై సంపత్ నంది, వెంకట్, నరసింహ నిర్మించిన సినిమా పేపర్ బాయ్. సంతోష్ శోభన్, రియా సుమన్, తాన్యా హూప్ హీరో హీరోయిన్లుగా నటిస్తున్న ఈ చిత్రానికి జయశంకర్ దర్శకత్వం వహించారు. సెప్టెంబర్ 7న విడుదల చేస్తామని ముందుగా ప్రకటించినా తాజాగా సినిమా ప్రీపోన్ అయింది. ఆగస్టు 31న విడుదల కానుంది. ఈ సందర్భంగా రోడ్ ట్రిప్‌ను ప్లాన్ చేసిన చిత్ర యూనిట్ ఈ రోజున స్టార్ట్ చేశారు. ఈ వివరాలను గురువారం హైదరాబాద్ ప్రసాద్ లాబ్స్‌లో ప్రెస్‌మీట్ నిర్వహించి అందులో భాగంగా టైటిల్ సాంగ్‌ను రిలీజ్ చేశారు. ఈ పాటను ప్రముఖ గీత రచయిత చంద్రబోస్ పాడటం విశేషం. పాట రాసిన కాసర్ల శ్యామ్ మాట్లాడుతూ- ఈ పాట విడుదల కోసం చాలా ఆసక్తిగా ఎదురుచూశాను. నాకు ఇన్‌స్పిరేషన్‌గా నిలచిన చంద్రబోస్ ఈ పాటను పాడటం విశేషం. ఆయనకు కృతజ్ఞతలు అన్నారు. మ్యూజిక్ డైరెక్టర్ భీమ్స్ సిసిరోలియో మాట్లాడుతూ- ఈనెల 31న సినిమా విడుదలవుతోంది. చంద్రబోస్‌ను అడగ్గానే కాదనకుండా పాటను పాడారు. ఎంటైర్ యూనిట్‌ను అభినందించారు అన్నారు. హీరో సంతోష్ శోభన్ మాట్లాతుతూ- ఆగస్టు 31న సినిమా విడుదలవుతోంది. ఈ సినిమాని అందరూ ఆదరిస్తారని నమ్ముతున్నాం అన్నారు. చిత్ర నిర్మాత సంపత్ నంది మాట్లాడుతూ- ట్రైలర్‌కి మంచి రెస్పాన్స్ వచ్చింది. కాసర్ల శ్యామ్ మంచి సాహిత్యంతో రచించిన పాటను చంద్రబోస్ అద్భుతంగా పాడారు. పేపర్, పేపర్‌బాయ్స్ ఉన్నంతకాలం ఈ పాట నిలిచిపోతుంది. ఆగస్టు 31న విడుదల చేస్తున్నాం అన్నారు.