హైదరాబాద్: నిరంకుశ నిజాం ప్రభువును ఎదిరించిన ఘనత తెలంగాణ ప్రాంతానికి ఉందని, సిఎం కెసిఆర్ ఓ లెక్కా.. అని టి.టిడిపి నేత మోత్కుపల్లి నర్సింహులు అన్నారు. ఆయన మంగళవారం ఇక్కడ మీడియాతో మాట్లాడుతూ, రాష్ట్రాన్ని దోచుకుంటున్న కెసిఆర్ కుటుంబాన్ని జనం తరిమికొట్టే రోజులొస్తాయన్నారు. సెంటిమెంటుతో తెలంగాణ రాష్ట్రాన్ని సాధించుకున్న జనం అదే సెంటిమెంటుతో తెరాసను గెలిపించి ఇపుడు బాధ పడుతున్నారన్నారు.

హైదరాబాద్: అల్లరి చేస్తున్నారని తల్లి తిట్టడంతో ముగ్గురు పిల్లలు ఇంటి నుంచి ఎటో వెళ్లిపోయిన ఘటన మీర్‌పేట వద్ద వెంకటగిరి కాలనీలో మంగళవారం వెలుగు చూసింది. అల్లరి ఎక్కువైందని పిల్లలను సోమవారం సాయంత్రం తల్లి మందలించింది. దీంతో అలిగిన పిల్లలు శ్రీశైలం (10), రేణుక (8), శివ (7) ఎవరికీ చెప్పకుండా ఇల్లు వదిలి పోయారు.

హైదరాబాద్: వరంగల్‌కు వెళుతున్న విరసం నేతలు వరవరరావు, వనమాల, హరగోపాల్ తదితరులను పోలీసులు మంగళవారం ఘట్‌కేసర్ వద్ద అదుపులోకి తీసుకున్నారు. వరంగల్‌లో జరుపతలపెట్టిన తెలంగాణ డమొక్రటిక్ ఫ్రంట్ సదస్సుకు విరసం నేతలు వెళ్లాలని భావించారు. అయితే, దారిలోనే వారిని పోలీసులు అడ్డుకున్నారు. టిడిఎఫ్ సదస్సుకు పోలీసులు అనుమతి ఇవ్వలేదు. సదస్సు జరిపేందుకు కోర్టు ద్వారా అనుమతి సంపాదిస్తామని విరసం నేతలు తెలిపారు.

హైదరాబాద్: గొంతుకోసి ఓ మహిళను దుండగులు కిరాతకంగా హత్య చేసిన సంఘటన మంగళవారం మాదాపూర్ సమీపంలోని నవభారత్‌నగర్‌లో వెలుగు చూసింది. స్థానికుల సమాచారం మేరకు పోలీసులు మృతదేహాన్ని పోస్టుమార్టంకు పంపి, దుండగుల కోసం ఆరా తీస్తున్నారు.