పీలేరు, అక్టోబర్ 26: రాష్ట్రంలోని కాపులను ముఖ్యమంత్రి చంద్రబాబునాయుడు కచ్చితంగా బిసి జాబితాలో చేరుస్తారని రాష్ట్ర కాపు కార్పొరేషన్ చైర్మన్ రామానుజయ తెలిపారు. గురువారం ఆయన చిత్తూరు జిల్లా పీలేరులో విలేఖర్లతో మాట్లాడుతూ రాష్ట్రంలో ఇప్పటి వరకు 1.50 లక్షల మందికి స్వయం ఉపాధి కల్పించినట్లు చెప్పారు. రాబోయే బడ్జెట్ సమావేశాల్లో కాపు కార్పొరేషన్‌కు ప్రత్యేక నిధులు కేటాయించడం జరుగుతుందన్నారు.

కర్నూలు, అక్టోబర్ 26: కంచ ఐలయ్యకు పిచ్చిపట్టి పిచ్చిపిచ్చి పుస్తకాలు రాస్తున్నారని రాజ్యసభ సభ్యులు టిజి వెంకటేష్ తీవ్రస్థాయిలో ఆగ్రహం వ్యక్తం చేశారు. ఆర్య అంటే శ్రేష్టమైన అని అర్థం.. అలాంటి ఆర్యవైశ్యులను కంచ ఐలయ్య విదేశీయులుగా పేర్కొనడం దుర్మార్గమన్నారు. ఆర్యవైశ్యులు ద్రావిడులేనని స్పష్టం చేశారు.

విశాఖపట్నం, అక్టోబర్ 26: విశాఖ వన్ టౌన్ ఏరియాలో తవ్వకాలు జరుపుతున్నప్పుడు బ్రిటిష్ కాలం నాటి ఫిరంగులు బయటపడ్డాయి. స్థానిక క్వీన్ మేరీ స్కూల్‌లో గత కొద్ది రోజులుగా నిర్మాణ పనులు జరుగతున్నాయి. కాలువల నిర్మాణం కోసం కూలీలు గురువారం తవ్వకాలు జరుపుతుండగా నాలుగు ఫిరంగులు బయటపడ్డాయి. భూమి లోపల మూడు అడుగులు తవ్వగానే ఈ ఫిరంగులు బయటపడినట్టు కార్మికులు తెలియచేశారు.

విజయవాడ, అక్టోబర్ 25: రాష్ట్రంలో నాబార్డ్ నిధులతో చేపడుతున్న అభివృద్ధి పనుల్లో జాప్యంపై రాష్ట్ర ప్రభుత్వ ప్రధాన కార్యదర్శి దినేష్‌కుమార్ ఆగ్రహం వ్యక్తం చేశారు. నిధుల వినియోగంలో, పనుల నిర్వహణలోనూ నిర్లక్ష్యం వహిస్తే సహించేది లేదని హెచ్చరించారు. వెలగపూడి సచివాలయంలో నాబార్డు నిధులతో గ్రామీణ ప్రాంతాల్లో చేపట్టిన అభివృద్ధి పనులపై బుధవారం ఆయన సమీక్ష సమావేశం నిర్వహించారు.