విజయవాడ, అక్టోబర్ 23: అమెరికాలోని అయోవా విశ్వవిద్యాలయ సాంకేతిక సహకారంతో కర్నూలు జిల్లాలో అత్యాధునిక విత్తన పరిశోధనా కేంద్రం ఏర్పాటు చేయనున్నట్లు వ్యవసాయ శాఖ మంత్రి సోమిరెడ్డి చంద్రమోహన్‌రెడ్డి చెప్పారు. 650 ఎకరాల విస్తీర్ణంలో రూ.680 కోట్ల వ్యయంతో ఈ కేంద్రాన్ని ఏర్పాటు చేస్తున్నట్లు తెలిపారు.

విజయవాడ, అక్టోబర్ 23: రాష్ట్రంలో డెంగ్యూ కేసులు గత సంవత్సరంతో పోలిస్తే ఈ సంవత్సరం బాగా పెరిగాయని రాష్ట్ర వైద్య, ఆరోగ్య శాఖ మంత్రి కామినేని శ్రీనివాస్ వెల్లడించారు. వెలగపూడి సచివాలయంలో సీజనల్ వ్యాధులు, జ్వరాలు, పథకాల అమలుపై వైద్య, ఆరోగ్యశాఖ ఉన్నతాధికారులు, నోడల్ ఆఫీసర్స్‌తో మంత్రి సోమవారం సమీక్ష నిర్వహించారు.

కరప, ఆక్టోబర్ 23: బంగ్లాదేశ్ రాజధాని ఢాకాలో 63వ కామన్‌వెల్త్ స్పీకర్ల సదస్సు నవంబర్ 6, 7 తేదీల్లో జరగనుందని రాష్ట్ర శాసనమండలి ఛైర్మన్ ఇన్‌ఛార్జి రెడ్డి సుబ్రహ్మణ్యం తెలిపారు. ఈ సదస్సుకు రాష్ట్రం తరపున శాసనసభ స్పీకర్ కోడెల శివప్రసాదరావు డెలిగేట్‌గా, పరిశీలకునిగా తాను హాజరవుతున్నట్లు తెలిపారు. తూర్పు గోదావరి జిల్లా కరపలో సోమవారం ఆయన విలేఖర్లతో మాట్లాడారు.

శ్రీశైలం, అక్టోబర్ 23: కార్తీక మాసం మొదటి సోమవారం సందర్భంగా శ్రీశైలంలో లక్ష దీపార్చన కార్యక్రమం కన్నుల పండువగా జరిగింది. భక్తులు పెద్దసంఖ్యలో ఈ కార్యక్రమంలో పాల్గొని కార్తీక దీపాలు వెలిగించారు. కార్తీక మాసాన్ని పురస్కరించుకుని దేవస్థానం వారు ఈ ఏడాది పుష్కరిణి వద్ద ప్రత్యేకంగా పుష్కర హారతి, లక్ష దీపార్చన కార్యక్రమానికి శ్రీకారం చుట్టారు. ఈ నెలలో ప్రతి సోమవారం ఈ కార్యక్రమాలు ఉంటాయి.