సిమ్లా: హిమాచల్‌ప్రదేశ్‌లోని అర్మౌరాలో ఘోర రోడ్డు ప్రమాదం సంభవించింది. పాఠశాల బస్సు లోయలో పడటంతో 12 మంది విద్యార్థులు గాయపడ్డారు. ఈ ప్రమాదంలో ఆరుగురు విద్యార్థులు, బస్సు డ్రైవర్ అక్కడికక్కడే చనిపోయారు. మృతులంతా సంగ్రహ పట్టణంలోని డీఏవీ పబ్లిక్ స్కూలు విద్యార్థులు.

ముంబయి: రాజలు కాలంలో భారత్‌ను పాలించినవారిలో మహారాష్ట్రీయులే ఎక్కువని ముఖ్యమంత్రి ఫడ్నవిస్ అన్నారు. ఆయన నాగపూర్‌లో జరిగిన ప్రపంచ మరాఠా సమ్మేళనానికి హాజరైన సందర్భంగా మాట్లాడుతూ 2050నాటికి ఖచ్చితంగా మరాఠావాసులే ప్రధాని పదవిని అధిష్టిస్తారని వ్యాఖ్యానించారు. అలాగే నిరుద్యోగ నిర్మూళనకు రిజర్వేషనే్ల పరిష్కారం కాదని అన్నారు.

తిరువనంతపురం: అయ్యప్ప ఆలయంలోకి ఇద్దరు మహిళలకు ప్రవేశం కల్పించటంపై కేరళలో శనివారంనాడు ఆందోళనలు కొనసాగుతున్నాయి. తలస్సెరీ ప్రాంతంలో బీజేపీ ఎంపీ వి. మురళీధర్ నివాసంపై బాంబు దాడులు జరిగాయి. అయితే ఈ ఘటనలో ఎలాంటి ప్రాణ నష్టం సంభవించలేదు. శనివారం తెల్లవారు జామున ఆరెస్సెస్ కార్యాలయానికి నిప్పు పెట్టారు. కోజికోడ్ జిల్లాలో సీపీఎం, బీజేపీ కార్యకర్తల మధ్య ఘర్షణ వాతావరణం చోటుచేసుకుంది.

షిల్లాంగ్, జనవరి 4: మేఘాలయ భూగర్భ గనుల్లో చిక్కుకుపోయిన 15 మందిని వెలికితీయడానికి అధికారులు శుక్రవారం నాడు విఫలయత్నం చేశారు. ప్రమాదం జరిగి 23 రోజులు అవుతున్నా సహాయ కార్యక్రమాల్లో ఆశించిన పురోగతి కనిపించలేదు. భూగర్భ గనుల్లో చిక్కుకుపోయిన వారి కోసం అధికారులు హైపవర్ పంపులు సెట్లు రప్పించారు. 13 పంపుసెట్లలో కేవలం మూడింటిని మాత్రం ప్రమాద స్థలిలో వినియోగించగలిగారు. అది కూడా పూర్తిగా కాదు.