విశాఖపట్నం, జూన్ 12: విశాఖ విమానాశ్రయంలో నవంబర్ నుంచి రోజూ కొన్ని సమయాల్లో పౌర విమానాల రాకపోకలపై నేవీ ఆంక్షలు విధించబోతోంది. ఇందుకు సంబంధించిన ప్రతిపాదనలను ఎయిర్ అధారిటీ ఆఫ్ ఇండియాకు విశాఖలోని తూర్పు నౌకాదళ అధికారులు పంపించారు. విశాఖకు వచ్చే విమానాలపై ఆంక్షలు విధించడంపై నగరంలోని పలు సంస్థలు అభ్యంతరం తెలియచేశాయి. టీడీపీ కూడా విమానాల రాకపోకలపై కేంద్రం ఆంక్షలు విధించడం తగదని పేర్కొంది.

న్యూఢిల్లీ, జూన్ 12: విభజన సమయంలో ఆంధ్రప్రదేశ్‌కు ఇచ్చిన హామీలను సంపూర్ణంగా అమలు చేయాలన్నదే ప్రధాని నరేంద్ర మోదీ అభిమతమని ఏపీ బీజేపీ రాష్ట్ర అధ్యక్షుడు కన్నా లక్ష్మీనారాయణ పేర్కొన్నారు. పార్టీ అధ్యక్ష బాధ్యతలు చేపట్టాక మొదటిసారి కన్నా ప్రధాని మోదీని ఆయన నివాసంలో మర్యాదపూర్వకంగా కలిశారు.

హైదరాబాద్‌: హైదరాబాద్ క్రికెట్ అసోసియేషన్(హెచ్‌సీఏ) అధ్యక్షుడు వివేక్‌కు హైకోర్టులో ఎదురుదెబ్బ తగిలింది. వివేక్ ఎన్నిక చెల్లదంటూ అంబుడ్స్‌మన్‌ ఇచ్చిన తీర్పును నిలిపివేస్తూ హైకోర్టు సింగిల్ జడ్జి ఇచ్చిన మధ్యంతర ఉత్తర్వులను ధర్మాసనం కొట్టివేసింది. తాజాగా పునర్విచారణ జరపాలని సింగిల్ జడ్జిని ధర్మాసనం ఆదేశించింది. కోర్టు తాజా ఉత్తర్వులతో వివేక్ మరోసారి పదవి కోల్పోనున్నారు.

పెద్దపల్లి: మంత్రి హరీశ్ రావు మంగళవారం ఉదయం సుందిళ్ల బరాజ్ పనులను పరిశీలించారు. ఇంజనీరింగ్ అధికారులు, కలెక్టర్‌తో సమావేశం నిర్వహించారు. కన్నెపల్లి పంప్‌హౌస్ పనుల ప్రణాళికపై వివరాలు అడిగి తెలుసుకున్నారు. రోజువారి ప్రణాళిక రూపొందించి లక్ష్యాలకు అనుగుణంగా పనిచేయాలని ఆదేశించారు.