హైదరాబాద్, ఆగస్టు 31: జంట నగరాల ప్రజలు అప్పుడప్పుడే నిద్దుర లేస్తూ, దిన చర్యల్లో నిమగ్నమవుతున్నారు. వాతావరణంలో ఏదో మార్పు. మబ్బుగా ఉండడం, చల్లని గాలి వీస్తూ ఉదయం 6 గంటల నుంచే వర్షం కురవడం ప్రారంభమైంది. అలా మధ్యాహ్నం 12 గంటల వరకు కురుస్తూనే ఉన్నది. ఇటీవల ఒక ప్రాంతంలో వర్షం కురవడం, మరో ప్రాంతంలో ఎండగా ఉండడం కనిపించేది. కానీ బుధవారం కురిసిన వర్షంతో జంట నగరాలు జలమయమయ్యాయి.

ఈడ్చికొట్టిన వానతో హైదరాబాద్ విలవిల్లాడింది. గంటలకొద్దీ కురిసిన అసాధారణ వానతో మహానగరం మునకేసింది. బుధవారం సిటీ నడినెత్తిన కురిసిన భారీ వర్షం పెను విషాదం మిగిల్చింది. పాతగోడలు కూలి నలుగురు, తెగిపడిన విద్యత్ తీగల కారణంగా ముగ్గురు బస్తీవాసులు మృత్యువాతపడ్డారు. 15 ఏళ్ల క్రితం భారీ వర్షానికి అతలాకుతలమైన హైదరాబాద్ అనుభవాలను మళ్లీ గుర్తు చేస్తూ, అంతటి వర్షం భయానక అనుభవాన్ని రుచి చూపించింది.

హైదరాబాద్, ఆగస్టు 31: హైదరాబాద్ నగరంలో కురిసిన భారీ వర్షాల కారణంగా ఇళ్లు కూలి మృతి చెందిన కుటుంబాలకు సిఎం కెసిఆర్ రూ.2 లక్షల ఎక్సగ్రేషియా ప్రకటించారు. అసాధారణ వర్షంతో ప్రాణ నష్టం సంభవించడం పట్ల సిఎం దిగ్బ్రాంతి వ్యక్తం చేశారు. నగరంలో భారీ వర్షం కురియడంతోపాటు మరో రెండు రోజులపాటు భారీ వర్షాలు కురుస్తాయన్న వాతావరణ కేంద్రం హెచ్చరికల నేపథ్యంలో యంత్రాంగం అప్రమత్తం కావాలని సిఎం ఆదేశించారు.

హైదరాబాద్‌ : నగరంలో బుధవారం గోడ కూలి చనిపోయిన వారి కుటుంబ సభ్యులను మంత్రి కేటీఆర్‌ పరామర్శించారు. భారీ వర్షాలకు గోడలు కూలి రామంతాపూర్ లో నలుగురు, భోలక్‌పూర్‌లో మరో ముగ్గురు మృతిచెందారు. పరిస్థితిని ఎప్పటికప్పుడు సమీక్షిస్తున్నట్లు, ట్రాఫిక్‌ జామ్‌ నివారణకు చర్యలు తీసుకుంటున్నట్లు మంత్రి చెప్పారు.