హైదరాబాద్: సార్వత్రిక సమ్మె సందర్భంగా శుక్రవారం హైదరాబాద్ సహా తెలంగాణ జిల్లాల్లో ఆర్టీసీ బస్సులు డిపోలకే పరిమితమయ్యాయి. హైదరాబాద్‌లో ఆటోలు, ప్రైవేటు వాహనాలను జనం ఆశ్రయించారు. ఆదిలాబాద్, ఖమ్మం, కరీంనగర్ జిల్లాల్లో సింగరేణి కార్మికులు సమ్మెలో పాల్గొంటున్నారు. తెలంగాణలో ఆర్టీసీ యూనియన్లన్నీ మద్దతు ఇవ్వడంతో బస్సులు తిరగడం లేదు. చాలా బ్యాంకులు, విద్యాసంస్థలు మూతపడ్డాయి.

హైదరాబాద్, సెప్టెంబర్ 1: స్థానిక రిజర్వేషన్ల చర్చను జోనల్ వ్యవస్థకే పరిమితం చేయడం సరైంది కాదని తెలంగాణ జాయింట్ యాక్షన్ కమిటీ చైర్మెన్ ప్రొఫెసర్ కోదండరామ్ అన్నారు. స్థానిక రిజర్వేషన్లపై సమగ్ర చర్చ జరగాల్సిన అవసరం ఎంతైనా ఉందన్నారు. జోనల్ వ్యవస్థ రద్దుపై తొందరపాటు నిర్ణయాల వల్ల తెలంగాణకు దీర్ఘకాలిక నష్టం జరిగే పరిస్థితి ఉంటుందన్నారు.

సంగారెడ్డి, సెప్టెంబర్ 1: ఖరీఫ్‌లో సాగు చేసిన ధాన్యం పంటను రక్షించాలన్న దృక్పథంతో సింగూర్ ప్రాజెక్టు నుంచి దిగువకు వదిలిపెట్టిన 0.35 టిఎంసిల నీరు వారం రోజులు గడుస్తున్నా ఇంకా ఘన్‌పూర్ ఆనకట్టకు చేరుకోకపోవడంతో అన్నదాతలు ఆందోళన చెందుతున్నారు. సింగూర్ ప్రాజెక్టు నిర్మాణం ఒప్పందం ప్రకారంగా నిల్వ ఉన్న నీటి నుంచి ఘన్‌పూర్ ఆనకట్టకు 0.35 టిఎంసిల నీటిని వదిలిపెట్టాల్సి ఉంది.

సంస్థాన్‌నారాయణపురం, సెప్టెంబర్ 1: తెలంగాణ సాధించుకున్నది గిరిజనుల భూములు లాక్కోవడానికేనా అని జెఎసి చైర్మన్ ప్రొఫెసర్ కోదండరాం ప్రభుత్వాన్ని సూటిగా ప్రశ్నించారు. నల్లగొండ జిల్లా సంస్థాన్‌నారారయణపురం మండలం రాచకొండ గుట్టల్లో గురువారం రాచకొండ గిరిజనుల భూగోస అధ్యయన యాత్ర సభను జెఎసి ఆధ్వర్యంలో నిర్వహించారు.